Այս շաբաթ Կատարի մայրաքաղաք Դոհայում անցկացվում է Սիրիայի ազգային խորհրդի առաջնորդների հանդիպումը՝ նոր ղեկավար ընտրելու և հետագա գործողությունների ծրագրերը մշակելու նպատակով:
Սիրիայի ընդդիմության ազգային խորհրդի ղեկավար է ընտրվել Ժորժ Սաբրան: Սաբրան քրիստոնյա է, երկար ժամանակ բնակվում է Թուրքիայում:
Մեկնաբանլով ընդդիմադիր առաջնորդների որոշումը՝ Սաբրան հայտարարել է, որ իր ընտրությունը ցույց է տալիս, որ ընդդիմությունը որևէ կոնկրետ կրոնի չի պատկանում:
Նա նաև դիմել է միջազգային հանրությանը՝ «միայն մեկ խնդրանքով»՝ ընդդիմությանն ապահովել մեծ քանակությամբ զենքով, որպեսզի իրենք կարողանան դադարեցնել արյունալի պատերազմը և շուտափույթ հաղթանակ տանեն Բաշար Ալ-Ասադի վարչակարգի նկատմամբ:
Սաբրան Սիրիայի քաղաքականության մեջ վետերան է: Լինելով նախկին կոմունիստ՝ նա իշխանությանը դեմ է եղել դեռ գործող նախագահի հոր՝ Հաֆեզ Ալ-Ասադի օրոք: Իր գործունեության ընթացքում Սաբրան մի քանի անգամ քաղաքական դրդապատճառներով բանտ է ընկել:
