Ֆրանսիայի ծայրահեղ աջ «Ազգային ճակատ» կուսակցությունը, որը կիրակի օրը հաղթել է Եվրախորհրդարանի ընտրություններում, երկրի նախագահ Ֆրանսուա Օլանդից պահանջել է կանչել Ֆրանսիայում Գերմանիայի դեսպանին՝ բացատրությունների համար: Այսպիսի հայտարարությամբ երեքշաբթի օրը France 5 հեռուստաալիքի ուղիղ եթերում հանդես է եկել «Ազգային ճակատի» փոխնախագահ Ֆլորիան Ֆիլիպոն:
«Տեղին չէ, որ օտարերկրացի նախարարը՝ գերմանացի նախարարը ֆրանսիացիներին սովորեցնի քվեարկել,- ասել է նա՝ մեկնաբանելով Գերմանիայի ֆինանսների նախարար Վոլֆգանգ Շոյբլեի արտահայտությունը, որն «Ազգային ճակատը» բնորոշել է որպես «ֆաշիստական և ծայրահեղական» կուսակցություն:- Նա իրեն իրավունք է վերապահում դատել ֆրանսիացիների ընտրությունը, նա վիրավորում է ընտրողներին ու նսեմացնող բառեր արտաբերում»:
Ֆիլիպոն նշել է, որ իր կուսակցությունն այդ կապակցությամբ երկրի նախագահից պահանջում է «կանչել Ֆրանսիայում Գերմանիայի դեսպանին և նրան հիշեցնել, որ Ֆրանսիան ինքնիշխան քվեարկության իրավունք ունի»:
Շոյբլեի ասածները, շարունակել է նա, վկայում են, որ ԵՄ-ի ամենաեռանդուն կողմնակիցների միջավայրում տիրել է «հետժողովրդավարական ոգին, եթե չասենք՝ հակաժողովրդավարական»: «Այդ մարդիկ այլևս չեն հարգում քվեատուփերի մոտ ժողովրդի արտահայտած վճիռը»,- եզրափակել է Ֆիլիպոն: