ԱՄՆ պետքարտուղար Հիլարի Քլինթոնը խոսել է Լիբիայում ԱՄՆ սպանված դեսպան Քրիստոֆեր Սթիվենսի արժանիքների մասին` նրան անվանելով «ընկած հերոս», հայտնում է ГОЛОС АМЕРИКИ-ն:
Քլինթոնը ելույթ է ունեցել «Ընդհանուր դիրքորոշում» (Common Ground) մրցանակի հանձնման արարողության ժամանակ: Մրցանակը շնորհվում է հակամարտությունների լուծման, բանակցությունների և խաղաղության ամրապնդման համար: Այս տարի մրցանակին արժանացել են Սթիվենսն ու այլք:
Քլինթոնը նաև հայտարարել է, որ Պետդեպարտամենտը և պաշտպանության նախարարությունն ուսումնասիրում են դրությունն արտասահմանում ամերիկյան առաքելություններում` անհրաժեշտության դեպքում դրանց անվտանգության պահպանման միջոցներն ուժեղացնելու նպատակով:
Սթիվենսն ու ևս 3 ամերիկացի սպանվել են սեպտեմբերի 11-ին Բենղազիում ԱՄՆ դեսպանատան վրա հարձակման հետևանքով:
Քլինթոնի խոսքով` Սթիվենսը հարձակման համար չէր մեղադրի հասարակ լիբիացիներին: «Քրիսը հասկանում էր, որ մարդկանց մեծ մասը, լինեն Լիբիայում, թե մեկ ուրիշ տեղ, չեն ընդունում ծայրահեղականների փաստարկները, որ մահն արժանապատվությունը վերադարձնելու և արդարության հասնելու միակ ուղին է: Նա այս ամենը հասկանում էր, ահա թե ինչու էր աշխատում Լիբիայում»,- նշել է նա:
Քլինթոնը նաև նշել է, որ ԱՄՆ-ը չի կարող կանխել բոլոր ահաբեկչությունները, սակայն երկիրը պատասխանատու է դրանց ռիսկի նվազեցման համար:
Նրա խոսքով` ԱՄՆ քաղաքացիները, որոնք իրենց երկրին ծառայում են արտերկրում, «ներկայացնում են համարձակ և մեծահոգի ազգի լավագույն ավանդույթները»:
