Երբ 2011 թվականի փետրվարի 17-ին ստորագրվեց կոալիցիոն հուշագիրը, ու դրանից ընդամենը օրեր առաջ Սերժ Սարգսյանին ընդդիմացող ԲՀԿ-ն ստորագրեց նախագահական ընտրությանը նրան սատարելու թուղթը, ԲՀԿ նախագահ Գագիկ Ծառուկյանը բազմաթիվ հարցերին ի պատասխան` նշեց, որ երկիրը արտաքին լուրջ մարտահրավերների առաջ է, և դրա համար էլ ինքը ստորագրել է Սերժ Սարգսյանին սատարելու հուշագիրը: Հետո Գագիկ Ծառուկյանը կրկին սկսեց ընդդիմանալ Սերժ Սարգսյանին, ինչը նշանակում է կամ ավելի շուտ հիմք է տալիս ենթադրելու, որ այդ արտաքին մարտահրավերները, որոնց մասին 2011-ի փետրվարին խոսում էր Գագիկ Ծառուկյանը, այլևս չկան:
Սակայն այստեղ էլ պարադոքսալ ինչ-որ բան է ստացվում, որովհետև նրա կուսակցության առաջատար և հայտնի դեմքերից մեկը` Վարդան Օսկանյանը, անընդհատ խոսում է այն մասին, որ Հայաստանը արտաքին լուրջ մարտահրավերների առաջ է: Այսինքն` Գագիկ Ծառուկյանը պետք է որ այսօր էլ սատարեր Սերժ Սարգսյանին, ոչ թե իր կուսակիցների միջոցով հայտարարեր, որ կոալիցիոն հուշագիրն այլևս գոյություն չունի: Ուրեմն ստացվում է նաև, որ այսօր արտաքին մարտահրավերը հենց Սերժ Սարգսյանն է, երբ ԲՀԿ-ն խոսում է արտաքին մարտահրավերների մասին, բայց Ծառուկյանը չի սատարում Սերժ Սարգսյանին: Բանն այն է, որ ԲՀԿ առաջնորդը չի էլ հայտարարում, որ Սերժ Սարգսյանը մարտահրավեր է Հայաստանին, որից պետք է ազատվել:
Ահա այսպիսի մի անհասկանալի իրավիճակում է ներկայումս ԲՀԿ առաջնորդը, որից փորձում են, այսպես ասած, միասնական կամ հզոր թեկնածու ստանալ ոչ միայն ԲՀԿ-ում, այլ անուղղակիորեն նաև Հայ ազգային կոնգրեսում, ՀՅԴ-ում և միգուցե «Ժառանգություն»-ում: Եվ այս թեկնածուն ենթադրվում է, որ պետք է պայքարի Սերժ Սարգսյանի և նրա իշխանության դեմ: Թե որքանով կարելի է այս պարադոքսը համարել պայքար` երևի թե այդ պայքարի առաջամարտիկները երբևէ հանգամանալից կբացատրեն հասարակությանը:
Սակայն այստեղ մի հարց է ծագում, որի պատասխանը շատ էական է առաջիկա զարգացումների համար: Ի՞նչ է անելու Գագիկ Ծառուկյանը, եթե վաղը Սերժ Սարգսյանը արտաքին մարտահրավերների շանտաժով նրան կրկին ստիպի սատարման հուշագիր կամ երդում ստորագրել: Գագիկ Ծառուկյանը 2011-ի բացատրությամբ հանդերձ` ստորագրելո՞ւ է այդ հուշագիրը, թե՞ այս անգամ հրաժարվելու է:
Նախագահական ընտրություններում այսպիսի մրցակիցը իսկական նվեր է ոչ միայն Սերժ Սարգսյանի, այլև ցանկացած մեկի համար, ով պատրաստվում է վերարտադրվել անօրինական մեթոդներով: Բանն այն է, որ Գագիկ Ծառուկյանն այդ ամենը լեգիտիմացնելու իդեալական թեկնածու է: Պարզապես այս անգամ լեգիտիմության հուշագիրը կստորագրվի ոչ թե ընտրություններից առաջ, այլ ընտրություններից հետո` ԿԸՀ պաշտոնական արձանագրությունների տեսքով:
