Լրատվամիջոցներն արդեն իսկ անդրադարձել են Դատական դեպարտամենտի «ռեկետին»: Օրերս դատական դեպարտամենտի կարգադրիչների ծառայության աշխատակիցները լրատվամիջոցների հետ զրույցում դժգոհել էին, որ ապրիլ ամսվա աշխատավարձերը ստացել են ուշացումով, ինչպես նաև աշխատակիցներից պարտադիր պահումներ են կատարվել 10-հազարական դրամ՝ առանց որևէ հիմնավորման:
Դատական դեպարտամենտի մամուլի խոսնակ Արսեն Բաբայանը խնդրի հետ կապված պարզաբանում էր ներկայացրել, թե կատարվածը զուտ տեխնիկական խնդիր է: Ֆինանսների նախարարության և դատական դեպարտամետի հաշիվների հետ կապված եղել է որոշակի սխալ, որն արդեն շտկվել է, և աշխատակիցների 10 հազարական դրամները փոխանցվել են նրանց հաշիվներին:
Դատական մի քանի կարգադրիչներ, սակայն, «Առաջին լրատվական»-ի հետ զրույցում նշեցին, որ խնդիրը շարունակում է չլուծված մնալ, որոշների գումարները փոխանցվել են, բայց կրկին պակաս: «Իրենք նախապես զգուշացրել էին, որ աշխատավարձը 10 հազար դրամի չափով պակաս է լինելու, սակայն պակաս գումարի չափը հասավ 20 հազար դրամի: Այնուհետև, երբ խնդիրը հնչեղություն ստացավ, անամոթաբար ասացին, թե իրենք տեղյակ չեն եղել, դա զուտ տեխնիկական խնդիր է, կուղղեն: Մի քանի օր անց պակաս գումարը փոխանցեցին, բայց կրկին պակաս: Կան աշխատողներ, ովքեր պակաս էին ստացել 20 հազար դրամ, սակայն հետ ստացան 10 հազար դրամը»,- ասացին աշխատակիցները՝ հավելելով, որ այս ամենը շարունակական բնույթ է կրում:
«Սա սկսվել էր դեռևս տարեսկզբից ու ամեն ամիս, սիստեմատիկ գումարները պակաս են փոխանցում: Խոսքը 2000-ից մինչև 10 հազար դրամի մասին է յուրաքանչյուր աշխատողի կտրվածքով»:
Նշենք, որ դատական դեպարտամենտը, մասնավորապես կարգադրիչների ծառայությունը մշտապես հայտնվում է այսպիսի պատմությունների կենտրոնում: Հերթական սկանդալը պայթեց ամիսներ առաջ, երբ պարզվեց, որ կարգադրիչների ծառայությունում կամ մի շարք գրանցված «չաշխատող» աշխատակիցներ: Քննությամբ բացահայտվեց, որ մի քանի տասնյակ անձինք պարզապես գրանցված են եղել, սակայն չեն ներկայացել աշխատանքի, իսկ նրանց աշխատավարձերը ստացել ու յուրացրել են նրանց պետերը: Այս սկանդալի պատճառով հենց ձերբակալվեցին ու մինչ օրս կալանավորված են դատական դեպարտամենտի նախկին ղեղավար Միսակ Մարտիրոսյանը և դատական կարգադրիչների ծառայության պետ Արմեն Մովսիսյանը:
