Քենթերբերիի նոր արքեպիսկոպոս է նշանակվել Իտոնի քոլեջի և Քեմբրիջի շրջանավարտ, Դարեմի եպիսկոպոս Ջասթին Ուելբին, հաղորդում է BBC News-ը՝ վկայակոչելով Մեծ Բրիտանիայի կառավարության հաղորդագրությունը:
Հայտարարության մեջ նշվում է, որ Ուելբիի թեկնածությունը հաստատել է Մեծ Բրիտանիայի թագուհի Էլիզաբեթ 2-րդը:
56-ամյա Ուելբին կդառնա Քենթերբերիի թվով 105-րդ արքեպիսկոպոսը: Նա այս պաշտոնին փոխարինելու է Ռոուեն Ուիլյամսին, ով մարտին հայտարարել էր պաշտոնից հեռանալու մտադրության մասին:
Դարեմի եպիսկոպոսը հայտարարել է, որ շատ զարմացած է և չէր սպասում նման բանի: Նա նաև նշել է, որ նոր պաշտոնը մեծ պատասխանատվություն է: Քենթերբերիի նոր արքեպիսկոպոս նշանակվելուց հետո տված մամլո ասուլիսում Ուելբին հայտարարել է, որ սատարելու է կանանց ձեռնադրությունը:
Ուելբին կրթություն է ստացել Իտոնում և Քեմբրիջում: 11 տարի նա զբաղվել է բիզնեսով, ապա որոշում է կայացրել ծառայել Աստծուն, սկսել է ուսումնասիրել աստվածաբանություն Դարեմի համալսարանում:
Ջասթին Ուելբին Քենթերբերիի արքեպիսկոպոս կթագադրվի 2013թ. մարտի 21-ին:
