2011-ի հուլիսին 77 մարդու սպանած նորվեգացի միայնակ ահաբեկիչ Անդերս Բրեյվիկը մտադիր է տամպլիեր ասպետի իր տոնական համազգեստը նվիրել Նորվեգիայի Դիմակայության թանգարանին: Այս մասին հայտնում է NRC հեռուստառադիոընկերությունը՝ հղում անելով ահաբեկչի փաստաբան Տրունդ Յորդետին:
Բանտում Բրեյվիկը պահանջել է իրեն վերադարձնել մի քանի հուշ իրեր, այդ թվում այն համազգեստը, որով նա պատկերված է բազմաթիվ լուսանկարներում: Նա որոշել է թանգարանին նվիրել համազգեստը, ժետոնը, որը ամրացված է եղել գրպանին ահաբեկչության ժամանակ, և զենքը:
«Բրեյվիկն իրեն տեսնում է որպես Դիմակայության շարժման մասնակից և կարծում է, որ իր իրերի տեղը թանգարանում է»,- լրագրողներին հայտնել է նրա փաստաբանը՝ հավելելով, որ ահաբեկիչը հասկանում է, որ իրերը դժվար թե երբևէ ցուցադրվեն թանգարանում:
Դա հաստատել են նաև թանգարանում՝ բացատրելով, որ մտադիր չեն ընդունել Բրեյվիկի իրերը որպես նվեր:
«Այդ առաջարկը զարմացրել է մեզ: Մեզ համար դժվար է պատկերացնել, թե ինչպես է Բրեյվիկը նման որոշում կայացրել»,- ասել է թանգարանի ներկայացուցիչ Իվար Կրագլունդը:
Իրավապահների խոսքով՝ դրանք կմնան ոստիկանությունում՝ որպես Նորվեգիայի պատմության խոշորագույն ահաբեկչության իրեղեն ապացույցներ:
