Օրերս տրանսպորտի և կապի նախարարությունը «Վերականգնվել է Ամասիան Գյումրիին կապող միակ ճանապարհը» վերնագրով լուր ու տեսանյութ է տարածել, որի ոչ միայն վերնագիրը, այլև բովանդակության հիմնական մասը չի համապատասխանում իրականությանը: Նախ, ինչպես մեզ հետ զրույցում նշեցին Շիրակի մարզի Ամասիա գյուղի բնակիչները, Ամասիա գյուղը Գյումրիին 2 ճանապարհ է կապում, ոչ թե «միակը»: Երկրորդ՝ Ամասիա գյուղը (նախկին շրջկենտրոնը) Գյումրու հետ կապող կարճ ճանապարհի՝ 21 կիլոմետր երկարությամբ ճանապարհի ոչ մի հատված չի վերականգնվել: Եվ այդ ճանապարհի՝ «Կապսի ձոր» կոչվող 7 կմ-անոց հատվածը անանցանելի է:
Երկրորդ՝ վերականգնում եղել է միայն Ամասիա գյուղը նախկին Ամասիայի տարածաշրջանի գյուղերից մեկին՝ Բերդաշենին կապող 16կմ-անոց հատվածում: Տարածաշրջանի մյուս գյուղերը (Զարիշատ, Զորակերտ, Ծաղկուտ, Գառնառիչ, Շաղիկ) Բերդաշենին (ու այդպիսով նաև՝ Ամասիա գյուղին) կապող մնացած 17 կմ-անոց հատվածում որևէ բարեկարգում չի կատարվում: Այսինքն, նախարարության «բարեկարգվում և վերականգնվում է գյուղերը մարզկենտրոն Գյումրիին և արտաքին աշխարհին կապող միակ՝ Ամասիայից Բերդաշեն տանող ավտոճանապարհը» ձևակերպումը ճիշտ է միայն Ամասիան Բերդաշենին կապող հատվածի մասով: Բայց այստեղ «վերականգնում» կամ «բարեկարգում» բառերը խիստ պայմանական կարելի է գործածել:
Այսպես, նախկինում այստեղ ասֆալտ է եղել, որի՝ գրեթե կեսի քայքայումից հետո ճանապարհը ոչ թե նորից ասֆալտապատվել է, այլ քանդվել է ամբողջ ասֆալտն ու փոխարենը կավաավազային հող է լցվել: Ահա այս կավաավազային հողի լցնելը Տրանսպորտի և կապի նախարարությունը համարել է «վերականգնում»՝ տալով հետևյալ ձևակերպումը՝ «Ճանապարհի առաջին կմ-ում իրականացվել են ասֆալտապատման, հաջորդ 16.4 կմ-ում՝ կոպճային աշխատանքներ»: Մինչդեռ, փորձը ցույց է տալիս, որ առավելագույնը 1 ձմեռ անցնելուց հետո այդ կավաավազային հողն ամբողջությամբ վերանում է, և հատկապես «Թորոսի ամառանոց» և «Չալտաշ» կոչվող հատվածներում ճանապարհը ամբողջությամբ դառնում է անանցանելի: