Սեպտեմբերի 26-ին ՀՀ գլխավոր դատախազությունում Ազգային գրադարանի հիմնանորոգման աշխատանքների ընթացքում յուրացման եղանակով առանձնապես խոշոր չափերի գույք յուրացնելու, պաշտոնեական և առևտրային կազմակերպության ծառայողի կողմից լիազորությունները չարաշահելու և պաշտոնեական լիազորությունները չարաշահելու դեպքի առթիվ հարուցված քրգործով քաղաքաշինության ԲՀԿ-ական նախկին նախարար Վարդան Վարդանյանն այս ընթացքում այլևս հարցաքննության չի կանչվել: «Հայկական ժամանակ»-ը գրում է, որ առաջին և վերջին անգամ, սույն գործի շրջանակներում նա ոստիկանություն ցուցմունք տալու էր հրավիրվել հոկտեմբերի 15-ին: Հիշեցնենք, կառավարությունում հրավիրված սկանդալային խորհրդակցության ժամանակ Սերժ Սարգսյանն Ազգային գրադարանի գործին էլ էր անդրադարձել, այնուհետև վարչապետը հայտարարել էր, թե գրադարանում տիրող վիճակը խայտառակություն և լկտիություն է, որից հետո հարուցվել էր հայտնի քրգործը: Երեկ Վարդան Վարդանյանը պատասխանեց խնդրի հետ կապված «ՀԺ» մի քանի հարցերի:
– Պարոն Վարդանյան, ձեր գործից ի՞նչ նորություն կա, ի՞նչ փուլում է:
– Ոչ մի բան չկա:
– Այսինքն, սառեցված վիճակո՞ւմ է:
– Ինչու է սառեցված, քննություն է, ընթանում է, ես ի՞նչ իմանամ՝ ինչ ընթացքի մեջ է, ինչ փուլում է ես չեմ կարող ասել:
– Ձեզ այլևս չե՞ն կանչել հարցաքննության և ընդհանրապես քանի՞ անգամ են կանչել:
– Մի անգամ, էն մի անգամն է:
– Դուք մի անգամ ասել էիք, որ առաջիկայում պարզաբանումներով հանդես կգաք:
– Նման բան չեմ ասել, եթե պետք լինի` կասեմ, եթե չէ` չէ: Ես խնդիր չունեմ:
– ԲՀԿ խոսնակն էլ էր ասել, որ առաջիկայում պարզաբանումներով հանդես կգաք:
– Դուք ինձ հարց տվեցիք, ես պատասխանեցի, ինչո՞ւ եք փորփրում, ասում եմ` տեղյակ չեմ, չգիտեմ:
– ԲՀԿ նախագահն այդ գործին ինչպե՞ս է վերաբերվում, նրա հետ խոսակցություն ունեցե՞լ եք, ի՞նչ է ասում:
– Իհարկե, ունեցել ենք, միշտ էլ խոսում ենք, միշտ էլ հանդիպում ենք: Նայում ենք, ինչ ընթացք կլինի` կասենք, հիմա ի՞նչ ասենք: Ինքը կուրսի է, գիտի, որ նորմալ է, ովքեր խախտումներ արել են, պատասխան կտան, ինչի՞ մասին է խոսքը:
– Դուք էլի պնդում եք, որ ոչ մի կապ չունե՞ք, ոչ մի մեղավորություն չունե՞ք:
– Այո:
– Իսկ ձեր կարծիքով, ինչո՞վ կավարտվի այդ գործը:
– Ես չեմ կարող այդ հարցին պատասխանել, ես ի՞նչ իմանամ:
– Քաղաքական շրջանակներում տեսակետ կար, որ Օսկանյանի դեպքի նման դուք էլ, հնարավոր է, վկայից դառնաք մեղադրյալ: Բացառո՞ւմ եք նման բան:
– Նրանց հարցրեք: Ովքեր գործը քննել են, նրանք էլ կասեն` ինչ կլինի, ասում եմ` ես բացարձակ դրա հետ կապ չունեմ: Ով սխալ է արել, բացթողում է արել, թող գնա, պատասխան տա, ինչի՞ մասին է խոսքը:
– Ուղղակի դուք եք նախարարը եղել:
– Բոլոր ոլորտներում էլ չարաշահումներ, բացթողումներ լինում են հիմա, կարո՞ղ է միայն մեր ոլորտում է նման բան:
