Սիրիացի ընդդիմադիրներին միավորելն ավելի բարդ հանձնարարություն դարձավ, քան Բաշար Ասադի ռեժիմի տապալումը: Չնայած Արևմուտքի և առաջին հերթին ԱՄՆ-ի ճնշմանը, սիրիական հակակառավարական խմբավորումների առաջնորդներն այդպես էլ չկարողացան համաձայնության գալ ստվերային կառավարություն ստեղծելու հարցի շուրջ: Հենց այդ նպատակով էլ նրանք հավաքվել են Կատարի մայրաքաղաք Դոհայում, որտեղ տարբեր համագումարների և կոնֆերանսների շրջանակում հանդիպում են շաբաթվա սկզբից: Ամերիկյան կողմի մշակված սցենարով միավորումից հրաժարվել են միանգամից մի քանի ազդեցիկ շարժումներ: Վերացել է նաև պոտենցիալ ստվերային վարչապետի՝ գործարար և քաղաքական գործիչ Ռիադ Սեյֆի թեկնածությունը, գրում է «Կոմերսանտ»-ը:
Նոր սկզբունքների շուրջ ընդդիմությանը միավորելու ծրագիրն առաջացել էր այն բանից հետո, երբ ԱՄՆ պետքարտուղար Հիլարի Քլինթոնը փաստացի անվստահության քվե էր հայտնել Սիրիայի ազգային խորհրդին: Հենց այդ խմբավորումն էր համարվում Բաշար Ասադի դեմ երկրների գլխավոր գործընկերը և ապագա կառավարության նախատիպը:
Ամերիկացիների սցենարով ապագա կառավարության նախատիպը պետք է դառնար 50 հոգուց կազմված կոմիտեն, որտեղ անդամների 1/3-ը կլինեին Սիրիայի ազգայի խորհրդի ներկայացուցիչները, 1/3-ը՝ պատվիրակներ Սիրիայի տարածքում «ազատագրված շրջաններից», ևս 1/3-ը խորհրդի կազմում չընդգրկված ընդդիմադիր խմբավորումների անդամներ:
Այն, որ ամերիկյան պլանը չհաջողվեց, հայտնի դարձավ երեկ, երբ «միավորող կոնֆերանսում» մասնկացությունից հրաժարվեցին Ազգային համակարգող կոմիտեն, Սիրիական դեմոկրատական պլատֆորմը, ինչպես նաև սիրիական քրդերին ներկայացնող շարժումները: Սիրիայի ազգային խորհուրդն էլ հիացմունքի մեջ չէր Վաշինգտոնի՝ խորուրդը նոր կառույցի վերածելու գաղափարից: 65-ամյա Ռաիդ Սեյֆը, որն աջակցում էր ԱՄՆ-ի նախաձեռնությանը, զրկվել է խորհրդի ղեկավարությունում իր պաշտոնից:
«Քաղաքակիրթ ընդդիմություն» ձևավորելու փորձերի ձախողումը նշանակում է, որ Բաշար Ասադի հակառակորդների շարքերում հետագայում իրենց ազդեցությունը կշարունակեն ուժեղացնել Ալ-Քաիդայի հետ կապ չունեցող արմատական խմբավորումները: Նրանց շարքերում կռվում են հիմնականում արտերկրից եկած ջիհադիստները: Այդ մարդկանց համար Ասադի տապալումը համաշխարհային խալիֆայություն ստեղծելու գլոբալ մարտի միայն մի դրվագն է, իսկ Արևմուտքը նույնպիսի թշնամի է, ինչպիսին սիրիացի նախագահը:
Փորձագետները մտավախություն ունեն, որ Սիրիայում ներկա վարչակարգի տապալումից հետո կարող է առաջանալ իշխանական վակուում, երբ շատ քաղաքների ու նահանգների նկատմամբ վերահսկողություն կսահմանեն ոչ ոքի չենթարկվող և արմատական տրամադրություններ ունեցող դաշտային հրամանատարները:
