ՀՀ պաշտպանության նախարարի հրամանով պաշտպանության նախարարին առընթեր հասարակական խորհրդի հովանու ներքո ստեղծված հանձնաժողովն այսօր քննարկելու է 2012 թ. աշնանային զորակոչի ընթացքում քաղաքացիների դիմումները և բողոքները: Այս զորակոչի ընթացքում ստացվել է 171 դիմում-բողոք, որոնց մեծ մասը զորակոչի ենթակա քաղաքացիների առողջական խնդիրներին է առնչվում, հիմնականում՝ մաշկային հիվանդություններ ունեցողներին:
Հասարակական խորհրդի նախագահ Գեղամ Հարությունյանը մի քանի դեպքի առնչությամբ կդիմի Կենտրոնական բժշկական հանձնաժողովին՝ լրացուցիչ պարզաբանումներ ստանալու նպատակով: Նրա խոսքերով՝ նախկինում մաշկային հիվանդությունների հետ կապված՝ 1-2 դիմում էր լինում, իսկ այժմ դրանց թիվը շատ է։ Ընդ որում, նրա դիտարկմամբ, մոտեցման մեջ փոփոխություն կա:
Օհանավան գյուղի բնակիչ Տիգրան Վարդանյանը եկել էր հորեղբոր հետ: Նրա երկու ծնողներն էլ հիվանդ են, մայրը և հայրը առաջին և երկրորդ կարգի հաշմանդամներ են, ընդ որում՝ մայրը կույր, հայրը՝ կրծքի քաղցկեղով անկողնային հիվանդ: Քույրն ամուսնացած է, երկու անչափահաս երեխաներ ունի: Տիգրանը տան միակ խնամողն է:
Թեև Գեղամ Հարությունյանն առանձնապես հույսեր և ակնկալիքներ չունի, բայց նորից պետք է դիմեն:
Շատ էին նաև մաշկային հիվանդություններ ունեցող տղաները, որոնց դեմքից ակնհայտ երևում էր, որ բանակ չեն ուզում գնալ:
Ծնողները հուզված էին, տղաները՝ նույնպես: