Վրաստանի վարչապետ Իրակլի Ղարիբաշվիլին ողջունում է Ռուսաստանի կառուցողական և դրական քաղաքականությունը: Այս մասին գրում է Trend-ը:
Այսպես է նա արձագանքել Ռուսաստանի ԱԳՆ ներկայացուցիչ Ալեքսանդր Լուկաշևիչի խորհրդին այն բանի վերաբերյալ, որ Վրաստանը լավ վերլուծի բոլոր սպառնալիքները մինչ ԵՄ-ի հետ ասոցացման համաձայնագրի ստորագրումը:
«Ամեն ինչ լավ կլինի: Կարճ ժամանակահատվածում մեզ հաջողվեց կարգավորել հարաբերությունները, ինչպես նաև այնպիսի լարվածության դեէսկալացիա, որը գոյություն ուներ տարիների ընթացքում` հատկապես օգոստոսյան պատերազմից հետո: Հավանաբար, ձեզ հայտնի է, որ Ռուսաստանը շատ կառուցողական է գնահատել և գնահատում մեր քաղաքականությունը: Ես միշտ ողջունում եմ նրանց կառուցողական և դրական քաղաքականությունը»,- հայտարարել է վարչապետը:
Նրա խոսքերով` «Վրաստանը Ռուսաստանի պաշտոնատար անձանցից լսել է, որ նրանք չեն խառնվի Վրաստանի և ԵՄ-ի միջև ասոցացման համաձայնագրի ձևակերպմանը, ինչը միայն ողջունելի է»: