«Մանչեսթեր Սիթի»-ի գլխավոր մարզիչ Ռոբերտո Մանչինին կդիմի ակումբի տնօրեն Չիկի Բեգիրիստայնին` «Ռոմա»-ի կիսապաշտպան Դանիելե դե Ռոսիի իրավունքները ձեռք բերելու խնդրանքով:
Հիշեցնենք, որ «քաղաքայիններ»-ը փորձում էին ձեռք բերել «Ռոմա»-ի կիսապաշտպանի տրանսֆերը նաև ամռանը: Ֆուտբոլիստը ստիպված էր մամլո ասուլիս կազմակերպել և հայտնել, որ շարունակելու է հանդես գալ «Ռոմա»-ում:
Ներկայումս իրավիճակը փոխվել է: «Ռոմա»-ն պատրաստ է ընդունել 29-ամյա իտալացու տրանսֆերի շուրջ առաջարկները: Դե Ռոսսիի իրավունքները գնելու համար «Սիթի»-ն պետք է 22 մլն եվրո վճարի:
«Եթե առաջարկ ստանանք, կքննարկենք այն: «Սիթի»-ն ամռանն առաջարկ է կատարել, որը մենք մերժել ենք: Նոր առաջարկը կրկին կուսումնասիրենք. հնարավոր է նաև կրկին մերժենք»,- իտալական լրատվամիջոցները մեջբերում են «Ռոմա»-ի գլխավոր տնօրեն Ֆրանկո Բալդինիի խոսքերը:
