Երկու տարի հետո Չինաստանն իր ռազմավարական միջուկային զինանոցում սուզանավերի վրա կունենա բալիստիկ հրթիռներ: Այս մասին հաղորդում է Reuters-ը՝ վկայակոչելով անվտանգության և տնտեսության հարցերով հատուկ հանձնաժողովի զեկույցը, որը պատրաստվել է ԱՄՆ-ի Կոնգրեսի հանձնարարությամբ:
Հանձնաժողովի տվյալներով՝ Չինաստանն այժմ գտնվում է «միջուկային վստահելի եռյակի ստեղծման նախաշեմին, որն իր կազմի մեջ ներառում է միջմայրցամաքային բալիստիկ հրթիռներ, բալիստիկ հրթիռներ սուզանավերի վրա և միջուկային ավիառումբեր»:
Ամերիկացի փորձագետները հիշեցնում են, որ Չինաստանը միջուկային զենքի տարածումը կանխարգելող միջազգային մի շարք համաձայնագրերի մասնակից է, սակայն, ի տարբերություն ԱՄՆ-ի և Ռուսաստանի, չի ստորագրել ռազմավարական սպառազինման սահմանափակման և կրճատման մասին պայմանագրեր: Այս կապակցությամբ մասնագետները ԱՄՆ-ի պետդեպարտամենտին առաջարկում են քննարկել այն հարցը, թե ինչպես Չինաստանին ներքաշեն նման համաձայնագրի մեջ:
Մասնագետները կարծում են, որ Պեկինի կողմից միջուկային սպառազինման ընդլայնումը կարող է փոխել Ասիա-խաղաղօվկիանոսյան տարածաշրջանի ուժերի հավասարակշռությունը և ազդել այլ երկրների դիրքերի վրա:
Չինաստանի կառավարությունը չի հրապարակում իր մոտ եղած միջուկային զենքի քանակության մասին տվյալներ, սակայն սպառազինման վերահսկման ամերիկյան ասոցիացիայի տվյալներով՝ ներկա պահին Չինաստանն իր տրամադրության տակ ունի 240 միջուկային մարտական լիցք:
