Իսրայելի վարչապետ Բինիամին Նեթանյահուն երկրի նախարարներին, ինչպես նաև իր կողմից ղեկավարվող «Լիկուդ» կուսակցության պատգամավորներին կարգադրել է առանց նախապես իր գրասենյակի հետ համաձայնեցնելու Բարաք Օբամայի` ԱՄՆ նախագահական ընտրություններում տարած հաղթանակի մասին մեկնաբանություններ չանել:
Ինչպես նշում է NRG-Маарив-ը, Իսրայելի վարչապետը զգուշանում է, որ բացասական մեկնաբանությունները կարող են ավելի բարդացնել Երուսաղեմի և Վաշինգտոնի առանց այն էլ ոչ այնքան պարզ հարաբերությունները: Հատկապես եթե հիշենք Օբամայի հակառակորդ Միթ Ռոմնիի և Նեթանյահուի ջերմ գրկախառնությունները:
Ինչ վերաբերում է Իսրայելի վարչապետին, ապա նա առավոտյան շնորհավորել է Օբամային հաղթանակի կապակցությամբ, նույնն արել է նաև նախագահ Շիմոն Պերեսը: Ցերեկը Նեթանյահուն հանդիպել է Իսրայելում ԱՄՆ դեսպան Դան Շապիրոյի հետ և ևս մեկ անգամ կրկնել շնորհավորանքը:
