Ֆրանսիայի ցանկությունն է, որպեսզի ԵՄ-ն ասոցացման միջոց գտնի Հայաստանի համար: Այսօր այս մասին լրագրողների հետ ճեպազրույցում ասաց ՀՀ-ում Ֆրանսիայի Հանրապետության արտակարգ և լիազոր դեսպան Անրի Ռենոն՝ անդրադառնալով ԼՂ հակամարտության կարգավորմանն ու ԱլԳ-ում Հայաստանի ապագա դիրքին:
Դեսպանն ուշադրություն հրավիրեց հրադադարի կնքման 20-ամյակի առիթով ԵԱՀԿ Մինսկի խմբի համանախագահների արած հայտարարությանը, որում ևս նշվում էր, որ անհրաժեշտ է գտնել վստահության մթնոլորտ, որով պայմանավորված կլինի, կամ որը կնպաստի ԼՂ հակամարտությանը միտված բանակցությունների խաղաղ լուծմանը:
«Սակայն, ցավոք, դեռևս 20 տարի առաջ ստորագրված հրադադարի պայմանագիրը հնարավորություն չտվեց հակամարտությունը կարգավորել, հակամարտությունը դեռ կա, այն շարունակվում է: Ինձ թվում է՝ հասունացել է պահը, որպեսզի այս տարածաշրջանը վերածվի խաղաղության, բարգավաճման և կայունության տարածաշրջանի, առաջին հերթին, որ այն վերածվի խաղաղության տարածաշրջանի, որովհետև խոսք անգամ չի կարող լինել ուժի կիրառման մասին: Դա ընդունելի չէ: Ֆրանսիան, լինելով ԵԱՀԿ Մինսկի խմբի համանախագահ երկիր, ջանք ու եռանդ չի խնայելու՝ շարունակելու համար իրեն վստահված առաքելությունը, այն է՝ որոնել հնարավոր տարբերակներ, որոնք պետք է հանգեցնեն հակամարտության լուծմանը: Այս հարցի ուղղությամբ Ֆրանսիայի պատրաստակամությանը՝ ի սպաս դնելու իրեն վստահված գործին, քաջատեղյակ են թե Ադրբեջանի, թե Հայաստանի ամենաբարձր մակարդակով ղեկավար այրերը: Այս պատրաստակամությունը ԵԱՀԿ Մինսկի խմբի համանախագահության ձևաչափում է և, բնականաբար, օժանդակվում և սատարվում է ԵՄ պատկան կառույցների կողմից»,- նշեց դեսպան Ռենոն:
Անդրադառնալով Արևելյան գործընկերությանը՝ դեսպանն ասաց, որ Հայաստանի որոշումը ռազմավարական որոշում է, այդ որոշմանը զուգահեռ ՀՀ-ն չի հրաժարվում մեկ այլ՝ իր համար կարևոր սկզբունքային դիրքորոշումից, այն է՝ շարունակել ԵՄ-ի հետ ունեցած համագործակցությունը բոլոր ոլորտներում:
Ըստ նրա՝ Հայաստանի որդեգրած այս դեմարշը ընկալելի ու հասկանալի է, Ֆրանսիան դրա դեմ ոչինչ չունի: «Մեր ցանկությունն է, որպեսզի ԵՄ-ն ասոցացման միջոց գտնի Հայաստանի համար՝ համաձայն այնպիսի բանաձևի, որում հաշվի են առնվում Հայաստանի ստանձնած մնացյալ հանձնառությունները»,- ասաց դեսպանը:
Առաջարկում ենք մանրամասներին ծանոթանալ տեսանյութի միջոցով:
