Ջրաշենում բնակվող Սահակյանների ընտանիքում սուգ է: Նրանք հողին հանձնեցին երկրորդ որդուն: Առաջնեկին հողին էին հանձնել 2012-ի դեկտեմբերին: Դեկտեմբերի 21-ին Նորոյին բանակ տարան՝ Խոջալու, նա դեռ չէր հասցրել հագնել զինվորականի համազգեստը, երբ մահը վրա հասավ: Երկու օր, ավելի ճիշտ՝ 45 ժամ կարողացան զինվոր պահել: Զինվորական համազգեստով նրան տեղափոխեցին տուն: Զինվորը մահացել էր մարդկային անտարբերության պատճառով:
Նորոյի մահվան հանգամանքները դեռ չպարզած՝ ընտանիքն նոր հարված է հասել:
Ջրաշենում դարձյալ սուգ է: Այժմ էլ հողին են հանձնում Սահակյանների երկրորդ զավակին: Հայրը՝ Նվեր Սահակյանը, «Առաջին լրատվական»-ին պատմեց, որ նախանցյալ կիրակի առավոտյան 17-ամյա որդին՝ Արտյոմը, իր երկրորդ որդին, իրենց թաղամասում փողոցով անցնելիս տեսել է, որ հարևանի տան տանիքին քեռին և հարևաններն աշխատում են, ինքն էլ բարձրացել է, միամիտ ոտքը գցել է, չի կարողացել հավասարակշռությունը պահել և ցած է ընկել:
«Մենք տանն էինք, տեղյակ չէինք, փոքր տղաս եկավ, թե՝ մարդ է ընկել տանիքից, գնացի, ասացին՝ Արտյոմն է, բայց տանիքից չի ընկել՝ ծածկի տակի կախովի առաստաղից, չի պատկերացրել, որ կարող է բետոն չլինի տակը, ոտքը դրել է՝ ընկել: Անմիջապես տարել էին հիվանդանոց: Առաջին պահին ասացի՝ ոչինչ, երևի կոտրվածք է ստացել, մինչև հասա հիվանդանոց, ասացին՝ վերակենդանացման բաժանմունքում է, կոմայի մեջ»,- հուզվեց հայրը:
Նա նշեց, որ այս օրերին այդպես էլ Արտյոմը չկարողացավ կոմայից դուրս գալ, մեկ շաբաթ բժիշկները պայքարեցին նրա կյանքի համար: Նվեր Սահակյանը նշեց, որ շատ շնորհակալ են բժիշկներից, որոնք ամեն գնով պայքարում էին երեխայի կյանքի համար, պատգամավոր Մհեր Սեդրակյանից, որ այս ընթացքում անընդհատ հետաքրքրվել է Արտյոմի առողջական վիճակով:
«Հազար տեղ հազար մարդու ասացինք, թողել էինք Աստծո հույսին: Մեկ օր միայն շարժեց ձեռքը, ու վերջ: Էդպես է եղել, իսկ մամուլի հրապարակումները, թե որդիս գնացել էր աշխատելու, չեն համապատասխանում իրականությանը: Դեպքն այդպես է եղել. ինչի ես կթողնեի՞, որ աշխատեր: Քեռին է այնտեղ գործ արել, բարձրացել է տանիք»,- ասաց Նվեր Սահակյանը:
Արտյոմը լիքը երազանքներ ուներ, մեծ ոգևորությամբ սպասում էր Վերջին զանգին: Ամենաառաջինն էլ ինքն է Վերջին զանգի գումարը տարել. «Լատարե էի խաղում, վերցրել եմ տվել, ամեն ինչ պատրաստ էր, երեխես շոր-մոր էր առնում, որ ամսի 23-ին Վերջին զանգին գնար: Խոսում եմ հետդ, բայց չեմ պատկերացնում: Չեմ հասկանում՝ ինչ է կատարվում, ով է ընկել ընտանիքիս հետևից»,- հուզվեց հայրը:
Մեկուկես տարի տեղի ունեցածից հետո Նորայրի գործով երկու շաբաթ առաջ քննիչն է զանգահարել և ասել, որ արդեն մեղադրանք են առաջադրում չորս հոգու նկատմամբ: Առաջիկայում կկանչեն՝ ծնողներին տեղեկացնելու: