Արաբական պետությունների լիգայի (ԱՊԼ) գլխավոր քարտուղար Նաբիլ Ալ-Արաբին գտնում է, որ Սիրիայի կառավարող ռեժիմը շուտով իր ավարտը կունենա։
«Կարևոր է, որ սիրիական ընդդիմությունը հնարավորինս շուտ ընդհանուր հայտարարի գա, քանի որ գործող ռեժիմի օրերը հաշվված են, և ցանկացած պահի պետք է սպասել իրադրության կտրուկ փոփոխության»,- հայտարարել է Ալ-Արաբին, ում խոսքերը մեջբերում է Al-Jazeera-ն:
Հիշեցնենք, որ Ֆրանսիայում Արաբական պետությունների լիգայի դեսպան Նասսիֆ Հիթթին հայտարարել էր, որ համաշխարհային գերտերությունները պետք է գան «նվազագույն համաձայնության», որը կկանգնեցնի արյունահեղությունը Սիրիայում:
Նրա խոսքերով՝ «առանց կառավարության կամ ընդդիմության կողմնակից համաշխարհային գերտերությունների պարզ և ուժեղ ազդանշանի՝ առաջընթաց չի լինի»: Այստեղ, արաբ քաղաքական գործչի կարծիքվ, առաջին տեղում Ֆրանսիան է, քանի որ «նա կարող է աջակցել այդպիսի նվազագույն համաձայնության ստեղծմանը»:
Հիթթիի կարծիքով՝ Քոֆի Անանի միջնորդությամբ «քաղաքական անցումային շրջանի» հաստատումը կարող է հիմք հանդիսանալ հետագա բանակցությունների համար: Այդ համաձայնագիրը Կրեմլում նունյպես հավանության էր արժանացել:
