Առնվազն 58 պետություն ՄԱԿ-ին կոչ է արել պաշտպանել նոր բանաձևը, որը նախատեսում է «սիրիական գործը» հանձնել Միջազգային քրեական դատարան և նպաստել դրա ընդունմանը, հաղորդում է Associated Press-ը:
Նոր նախագծի համաձայն՝ Միջազգային քրեական դատարանը պետք է ուսումնասիրի Սիրիայի նախագահ Բաշար ալ-Ասադի զորքերի, կառավարամետ զինված խմբավորումների, ինչպես նաև ընդդիմադիրների կողմից իրականացված լուրջ հանցագործությունների վերաբերյալ մեղադրանքները:
Բանաձևի նախագծի հեղինակ-պետությունները կոչ են անում, որպեսզի հնարավորինս շատ երկիր միանա դրան, ինչը հնարավորություն կտա «հստակ քաղաքական ազդանշան ուղարկել առ այն, որ ամենալուրջ հանցագործություն իրականացնողը միջազգային իրավունքի համաձայն չի կարող անպատիժ մնալ»:
Գործակալությունը, սակայն, նշում է, որ, ամենայն հավանականությամբ, Ռուսաստանն ու Չինաստանը կարգելափակեն բանաձևը: Մյուս կողմից, իրավապաշտպանները կարծում են, որ միջազգային լայն աջակցությունը կարող է ազդել այդ երկրների որոշման վրա:
Բանաձևի նախագիծը հիմնվում է ՄԱԿ-ի ԱԽ-ի կողմից նշանակված անկախ հանձնաժողովի զեկույցների վրա: Այդ տվյալներով՝ սիրիական զորքերը և նրանց համախոհները պատասխանատու են մարդկանց զանգվածային սպանությունների 6, իսկ ընդդիմադիրները՝ 1 դեպքի համար, որոնց մասին հաղորդումներ են ստացվել վերջին մեկուկես տարվա ընփացքում:
