Հարավային Կորեայի նախագահ Պակ Կին Հեն հերթական անգամ ներողություն է խնդրել խորտակված «Սևոլ» նավի 286 զոհերի հարազատներից և ստանձնել ողբերգության պատասխանատվությունը: Այս մասին հայտնում է Newsru.com-ը:
«Որպես նախագահ, ով պատասխանատու է Հարավային Կորեայի բնակիչների կյանքի ու անվտանգության համար, անկեղծ ներողություն եմ խնդրում մարդկանց պատճառված տառապանքների համար: Վերջին հաշվով՝ վթարի հարցում ոչ հմուտ արձագանքի պատասխանատվությունն իմ վրա է ընկնում»,- ասել է Հարավային Կորեայի նախագահը՝ փոխանցում է ABC-ն:
Նրա խոսքով՝ առափնյա ծառայությունը, որը չի կարողացել հավուր պատշաճի կատարել փրկարարական առաքելությունը, կլուծարվի, պարտականությունները կփոխանցվեն անվտանգության ազգային գործակալությանը: Ջրում միջադեպերի հետաքննությունը հանձնարարվում է ոստիկանությանը:
Իր վրա պատասխանատվություն ստանձնելով՝ ավելի վաղ հրաժարական էր տվել երկրի վարչապետը:
