Ուկրաինայի Կոմունիստական կուսակցության առաջնորդ Պյոտր Սիմոնենկոն հանում է իր թեկնածությունը նախագահական ընտրություններից: Այս մասին նա հայտարարել է Ազգային հեռուստատեսության առաջին ալիքի եթերով հեռուստաբանավեճի ժամանակ՝ գրում է ITAR-TASS-ը:
Սիմոնենկոն հայտարարել է, որ «այլախոհության դեմ պայքարը, գրաքննությունը մեկ պատասխան են տալիս ընտրությունների վերաբերյալ հարցին. մեր համոզմամբ՝ դրանք չեն լինի լեգիտիմ»:
«Այդ պատճառով էլ Կոմկուսը որոշում է ընդունել, և մենք՝ կոմունիստներս, հանում ենք իմ թեկնածությունը, որպեսզի այսօր Ուկրաինան փրկենք սանձարձակությունից, որն այսօր տեղի է ունենում»,- ասել է քաղաքական գործիչը:
Նշվում է, որ Սիմոնենկոյի այս հեռուստաելույթից հետո «ավտոմայդանի» ակտիվիստները հետապնդել են նրա ավտոմեքենան: Նրանց խոսքերով՝ իրենք մտադիր էին իրենց դժգոհությունը հայտնել Կոմկուսի առաջնորդին՝ ռուսամետ ակտիվիստներին պաշտպանելու համար:
«Ավտոմայդանի» ակտիվիստներին հաջողվել է հասնել նրա ավտոմեքենային, սակայն այնտեղից կրակ են բացել նրանց ուղղությամբ: