Եվրոպայի օրվա նախօրեին Ուկրաինա են այցելում մի ամբողջ շարք եվրոպացի պաշտոնյաներ: Կիև են ժամանել ԵՄ ընդլայնման և հարևանության քաղաքականության հարցերով հանձնակատար Շտեֆան Ֆյուլեն և Լեհաստանի ու Շվեդիայի արտգործնախարարներ Ռադոսլավ Սիկորսին ու Կարլ Բիլդտը: Այս մասին հայտնում է BBC-ն:
Ինչպես սպասվում է, Ֆյուլեն ու Բիլդտը կմասնակցեն Ուկրաինայում Եվրոպայի օրվա տոնակատարություններին, որոնք կկայանան մայիսի 17-ին:
Այսօր եվրահանձնակատր Ֆյուլեն կհանդիպի Գերագույն ռադայի խոսնակ և նախագահի պաշտոնակատար Ալեքսանդր Տուրչինովի հետ:
Լեհաստանի արտգործնախարար Սիկորսկին Ուկրաինայում կմասնակցի Ուկրաինայի և Լեհաստանի արտգործնախարարների խորհրդի հանդիպմանը: Նա նաև կհանդիպի Ուկրաինայի արտգործնախարարի պաշտոնակատար Անդրեյ Դեշչիցայի և ռադայի խոսնակ Տուրչինովի հետ:
Այցի նախօրեին Սիկորսին մտավախություն է հայտնել, որ Ռուսաստանը կարող է օկուպացնել ոչ միայն Ուկրաինայի տարածքը:
«Սա դարաշրջանի ավարտն է, երբ թվում էր, որ Եվրոպայում պատերազմն անհնարին է: Այսօր մենք ապրում ենք Եվրոպայում, որում Երկրորդ աշխարհամարտից հետո առաջին անգամ մի եվրոպական պետությունը խլել է այլ եվրոպական երկրի տարածքը»,- հայտարարել է Սիկորսկին:
Շվեդիայի արտգործնախարար Կարլ Բիլդտը, որը նույնպես բազմիցս քննադատել է Ռուսաստանի քաղաքականությունն Ուկրաինայի հանդեպ, կլինի Կիևում և Խերսոնում: Նա ճեպազրույց կունենա ուկրաինական ճգնաժամային մեդիա կենտրոնում:
Եվրոպացի պաշտոնյաների այցերն Ուկրաինա տեղի են ունենում երկրի արևելքում հակամարտության նոր սրման ֆոնին:
Դոնեցկի «ժողովրդական նահանգապետ» Պավել Գուբարյովը հայտարարել է Դոնբասի՝ ռազմական դրության անցման մասին: Նա հայտարարել է, որ եթե Ուկրաինան անհապաղ զորքերը դուրս չբերի Դոնեցկի տարածքից, իրենք կսկսեն ոչնչացման գործընթաց:
Շաբաթ օրը Դոնեցկում ծրագրված է ճգնաժամի կարգավորման հերթական կլոր սեղանը, որին կարող են մասնակցել ինչպես ուկրաինացի, այնպես էլ օտարերկրյա ներկայացուցիչները, եթե իշխանությունն ապահովի այդ միջոցառման անվտանգությունը:
