Ադրբեջանում ԱՄՆ դեսպան Ռիչարդ Մորնինգսթարը անդրադարձել է ԵԱՀԿ Մինսկի խմբի ամերիկացի համանախագահ Ջեյմս Ուորլիքի՝ միջազգային խաղաղության «Քարնեգի» հիմնադրամում հնչեցրած հայտարարությանը՝ հայտնում է haqqin.az-ը:
«ԵԱՀԿ Մինսկի խմբի ամերիկացի համանախագահ Ջեյմս Ուորլիքի՝ վաշինգտոնյան «Քարնեգի» կենտրոնում արած հայտարարությունը կարևոր նշանակություն ունի»,- լրագրողներին ասել է Մորնինգսթարը:
«Հայտարարության մեջ հնչած գաղափարները ճշտությամբ արտացոլում են Լեռնային Ղարաբաղի հակամարտության հարցում ԱՄՆ կառավարության քաղաքականությունը: Հայտարարության հիմնական նպատակն է հակամարտության երկու կողմերին ոգեշնչելն ու կարգավորման ուղղությամբ անհրաժեշտ քայլերի կոչ անելը»,- նշել է նա:
Դեսպանը նշել է, որ այնտեղ արտացոլել են հակամարտության լուծման համար անհրաժեշտ 6 սկզբունքները:
Մորնինգսթարի խոսքով՝ համանախագահը նշել է տարածքային ամբողջականությանը, ժողովուրդների ինքնորոշման իրավունքին և ուժ չկիրառմանը համապատասխան՝ Լեռնային Ղարաբաղի կարգավիճակը որոշելու անհրաժեշտությունը:
Մորնինգսթարի խոսքով՝ հիասթափեցնող է այն, որ բանակցությունները 20 տարի շարունակվում են:
«Հույս ունենք, որ վկան կլինենք երկու կողմերի կողմից դրական քայլերի»,- ասել է նա: