ԱՄՆ նախագահի թեկնածուներ Բարաք Օբաման և Միթ Ռոմնին ընտրություններից առաջ վերջին երեկոն անցկացրել են երաժշտական աստղերի ուղեկցությամբ: Գործող նախագահը ընտրությունների նախօրեին նախընտրական միջոցառումներ է անցկացրել երեք նահանգներում՝ Վիսկոնսինում, Օհայոյում և Այովայում: Ռոք և ժողովրդական երգիչ Բրյուս Սպրինգսթինը ուղեկցել է նրան ողջ օրվա ընթացքում: Օհայոյում Օբամային է միացել նաև նրա հին կողմնակից, ռեփեր Jay-Z-ն:Այս մասին հայտնում է RIA Novosti-ն:
Օբամային ուղեկցող նախագահական վարչակազմի լրագրողներին հաջողվել է կարճ հարցազրույց վերցնել երգչից և հարցնել՝ նախագահական օդանավով շրջագայելը նրան արդյոք դո՞ւր եկավ:
«Զվարճալի էր»,- պատասխանել է Սպրինգսթինը: Նա պատմել է, որ ճանապարհին Օբամայի հետ քննարկել է «Սենդի» փոթորկից հետո Նյու Ջերսի նահանգի ափը վերականգնելու հեռանկարները:
Ռոմնիին աջակցելու համար ընտրությունների վերջին օրը Օհայո նահանգ էր եկել Marshall Tucker Band խումբը, իսկ երեկոյան Նյու Հեմփշիրում հանրապետականին բեմում միացել է երգիչ և երաժիշտ Քիդ Ռոքը:
Երաժշտական և կինոարդյունաբերության աստղերը հաճախ են մասնակցում նախագահի թեկնածուների նախընտրական արշավներին: Ընտրությունների նախաշեմին դերասաններն ու ռեժիսորները բաժանվում են երկու ճամբարի: Նրանից շատերը նույնիսկ դառնում են թեկնածուների արշավների խոշոր հովանավորներ:
Այս տարի մեծ ակտիվություն են ցուցաբերել Օբամայի կողմնակիցները՝ դերասաններ Ջորջ Քլունին և Սառա Ջեսիկա Փարքերը: Նրանցից յուրաքանչյուրը իր տանը ընդունելություն է կազմակերպել նախագահի մասնակցությամբ: Այդ երեկոների տոմսերի արժեքը կազմել է 40 հազար դոլար: Հաջակցություն Օբամայի՝ հրապարակավ հանդես են եկել նաև ռեժիսոր Սթիվեն Սփիլբերգը, դերասաններ Ռոբերտ դե Նիրոն, Մորգան Ֆրիմանը, Սեմյուել Ջեքսոնը, Լեոնարդո դի Կապրիոն, Սկարլետ Յոհանսոնը, Վուպի Գոլդբերգը, Նատալի Փորթմանը, Էնն Հաթաուեյը, Եվա Լոնգորիան, Սալմա Հայեկը, Ալիշա Քիսը, Ռիկի Մարտինը, երաժիշտներ Jay-Z-ն, Մարկ Էնթոնին, Բեյոնսեն, Մրայա Քերին, Մադոննան, Գվեն Ստեֆանին, Լեդի Գագան և Քեթի Փերին:
Աշնան սկզբին Ֆլորիդայի Տամպա քաղաքում անցկացված հանրապետականների համագումարի գլխավոր աստղը եղել է դերասան և ռեժիսոր Քլինթ Իսթվուդը: Համաձայն Pew Research ինստիտուտի անցկացրած հարցումների՝ աստղի ելույթը համագումարին հետևողներին ավելի շատ էր դուրս եկել, քան հենց թեկնածուի խոսքը: Ռոմնիին հրապարակավ աջակցել են նաև դերասաններ Չակ Նորիսն ու Ջոն Վոյթը:
