ՆԱՏՕ-ն, որպես կազմակերպություն, չունի ռազմական տեխնիկա կամ հետախուզական միջոցներ՝ Ուկրաինային հստակ ռազմական օգնություն ցուցաբերելու համար: Այդ ամենն ունեն դաշինքի անդամ երկրները՝ հայտնել է ՆԱՏՕ-ի գլխավոր քարտուղար Անդերս Ֆոգ Ռասմուսենը՝ պատասխանելով մայիսի 15-ին Բրատիսլավայում կայացած համաշխարհային անվտանգության միջազգային համաժողովի մասնակիցների հարցերին:
«Մենք կախված ենք դաշինքի առանձին անդամներից: Այսպիսով՝ ռազմական տեխնիկայի, հետախուզության, հաղորդակցությունների միջոցների և այլ հարցեր պետք է լուծվեն Ուկրաինայի և ՆԱՏՕ-ի առանձին անդամների միջև երկկողմ հիմքի վրա»,- Ռասմուսենի խոսքերն է մեջբերում «Ինտերֆաքս-Ուկրաինան»:
ՆԱՏՕ-ի գլխավոր քարտուղարի խոսքով՝ Ուկրաինան Բրյուսելին է ուղղել օգնության մասին խնդրանքների ցուցակը, և դաշինքում դրան դրական են արձագանքել: Խնդրանքները վերաբերում են այն ոլորտներին, որոնցում ՆԱՏՕ-ն կարող է իրական օգնություն ցուցաբերել:
«Մենք որոշել ենք ընդլայնել մեր գործընկերային նախագծերը ռազմական բարեփոխումների անցկացման, Ուկրաինայի զինված ուժերի արդիականացման գործում, մեծացնել օպերատիվ փոխգործակցության ունակությունը, այդ թվում՝ Ուկրաինայի մասնակցությունը ՆԱՏՕ-ի զորավարժություններին և այլն: Այդպիսով՝ մենք արդեն շատ բան ենք անում՝ որպես դաշինք»,- ասել է Ռասմուսենը:
