ՆԱՏՕ-ի համար գոյություն չունի հակասություն Հայաստանի՝ Հավաքական անվտանգության պայմանագրի կազմակերպությանը (ՀԱՊԿ) անդամակցելու ու դաշինքի հետ համագործակցելու միջև: Այս մասին այսօր հայտարարել է Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ափաթուրայը:
«Մենք հասկանում ենք, որ Հայաստանը ցանկանում է վարել հավասարակշռված արտաքին քաղաքականություն: Մեզ համար դա խնդիր չէ: ՆԱՏՕ-ի համար այդ մոտեցումը լավագույն վկայությունն է, որ մենք ոչ ոքի հետ չենք մրցակցում»,- ըստ RIA Novosti-ի` լրագրողներին ասել է Ափաթուրայը:
Նա նաև հիշեցրել է ՀԱՊԿ-ի ռազմական զորավարժությունների մասին, որոնք այս տարի անցկացվել են Հայաստանում՝ նկատելով, որ դա դաշինքի համար դարձյալ խնդիր չէ:
Իր հերթին Հայաստանում ԱՄՆ դեսպան Ջոն Հեֆերնը նույնպես հայտարարել է, որ հակասություններ չի տեսնում ՀԱՊԿ-ին Հայաստանի անդամակցության ու ՆԱՏՕ-ի հետ փոխգործակցության միջև:
«Այստեղ ոչ մի մրցակցություն չկա: Սառը պատերազմը արդեն ավարտվել է, և Հայաստանը, ունենալով առանձնահատուկ հարաբերություններ Ռուսաստանի ու ՀԱՊԿ-ի հետ, նաև ՆԱՏՕ-ի գործընկերն է»,- ասել է Հեֆերնը:
Նա նկատել է, որ ՀԱՊԿ մյուս անդամները, այդ թվում՝ անձամբ Ռուսաստանը, գործընկերային հարաբերությունների մեջ են ՆԱՏՕ-ի հետ:
Ամերիկացի դիվանագետը ընդգծել է, որ ԱՄՆ-ն ու Ռուսաստանը սերտորեն համագործակցում են տարածաշրջանում, հատկապես ԵԱՀԿ Մինսկի խմբի շրջանակում՝ Ղարաբաղյան հակամարտությունը կարգավորելու ուղղությամբ:
Խոսելով Հայաստանի՝ ՆԱՏՕ-ի հետ համագործակցության մասին` Հեֆերնը նշել է մի շարք ուղղություններ, մասնավորապես խաղաղապահ գործունեությունը ու պաշտպանության ոլորտում բարեփոխումները:
«ՆԱՏՕ-ն փորձում է Հայաստանի բանակը դարձնել ավելի պրոֆեսիոնալ, հասարակության համար ավելի բաց»,- ասել է դեսպանը:
Ափաթուրայն ու Հեֆերնը մասնակցում են Հայաստանում «ՆԱՏՕ-ի շաբաթվա» շրջանակում անցկացվող «Համագործակցային անվտանգության ամրապնդումը. ՆԱՏՕ-ի նոր գործընկերային քաղաքականության հավելյալ ներդրումը» գագաթնաժողովին:
Ամենամյա 6-րդ «ՆԱՏՕ-ի շաբաթը» մեկնարկել է նոյեմբերի 1-ին ու կշարունակվի մինչև նոյեմբերի 8-ը:
Հայաստանի ու ՆԱՏՕ-ի միջև համագործակցությունը ենթադրում է տարածաշրջանային անվտանգության հարցով պարբերաբար խորհրդատվությունների անցկացում, Հայաստանի ռազմական դոկտրինի մշակում, բյուջետային ու պաշտպանական գործընթացի կատարելագործում և այլն:
