Երուսաղեմում Քրիստոսի գերեզմանը հնարավոր է՝ փակվի վերջին երկու տարիներին կուտակված պարտքերի պատճառով: Ջրամատակարարման ընկերությունը ներկայացրել է վերջին 15 տարիների ընթացքում 2,5 մլն դոլար կազմած անդորրագիր, և այս պահին սառեցված են տաճարի հաշիվները:
Երուսաղեմի հայոց պատրիարքի տեղապահ Արիս արքեպիսկոպոս Շիրվանյանը «Առաջին լրատվական»-ի հետ զրույցում նշեց, որ հայերը գերեզմանի սեփականատերերից մեկն են, հույների և կաթոլիկների հետ նույն դիրքն ունեն, և հիմա պետք է որոշեն մեկ միասնական որոշման հանգելու հարցը:
Այս հարցը, նրա խոսքով, նոր չէ, այն առկա է արդեն երկու տարուց ավելի, քանի որ 2 տարի առաջ տեղի իշխանությունները ուժը կորցրած են ճանաչել Օսմանյան կայսրության ժամանակներից սահմանված ջրամատակարարման կամ այլ կոմունալ ծառայությունների համար տրվող արտոնությունները:
Արիս սրբազանը չի կարծում, թե այս ամենը միտումնավոր արվում իսրայելական իշխանությունների կողմից:
Հիշեցնենք, որ օրեր առաջ Jerusalem Post իսրայելական թերթը քրիստոնեական աշխարհի սրբություններից մեկը՝ Երուսաղեմում Աստծո գերեզմանի տաճարը, ֆինանսական խնդիրների պատճառով հայտնվել է փակման վտանգի առջև։
Ըստ պարբերականի, այս տաճարը կառավարող հունական ուղղափառ պատրիարքարանի հաշիվները Երուսաղեմին ջրով ապահովող «Գիխոն» կորպորացիայի պահանջով սառեցվել են: Ընկերության ներկայացուցիչները պնդում են, որ պատրիարքարանը տաճարի ջրամատակարարման համար պարտք է մոտ երկուսուկես միլիոն դոլար:
Թերթը նշում է, որ հույն ատրիարքարանը, հրաժարվում է վճարել այդ գումարը, պատճառաբանելով, որ տաճարը երբեք ջրի համար չի վճարել՝ ո՛չ խաչակիրների, ո՛չ արաբների, ո՛չ Օսմանյան կայսրության օրոք և ո՛չ էլ դրանցից հետո: 1969 թ. Վեցօրյա պատերազմից հետո Երուսաղեմի քաղաքապետը հաստատել է այդ կարգը:
Սակայն ավելի ուշ տաճարի ջրամատակարարումը հանձնվել է մասնավոր ընկերության, և «Գիխոն»-ի հաշվապահությունը, տեղեկացված չլինելով այդ հին ավանդույթի մասին, սկսել է պատրիարքարանին հաշիվներ ուղարկել, որոնք մնացել են չվճարված:
Տաճարում հաստատում են, որ ոչ մի փաստաթուղթ, որն իրենց ազատում է ջրի դիմաց վճարելուց, գոյություն չունի, սակայն ավանդույթը փաստաթղթից ուժեղ է:
Ինչևէ, պատրիարքարանի հաշիվները դատարանի կողմից սառեցվել են, որի արդյունքում այն զրկվել է սովորական աշխատանքային ռեժիմից: Թեոֆիլ III պատրիարքը հայտարարել է, որ եթե մոտ ժամանակներս հարցը չլուծվի, ինքը ստիպված կլինի փակել տաճարը:
Jerusalep post-ի տեղեկացմամբ, հույն եկեղեցու առաջնորդները խնդիրը լուծելու խնդրանքով արդեն դիմել են Իսրայելի կառավարությանը, սակայն պատասխան առայժմ չեն ստացել: Եկեղեցու ներկայացուցիչները հայտարարել են, որ իրադրության վերջնական կարգավորման համար պատրաստ են վճարել այդ պարտքը, սակայն դա միանգամից վճարելու հնարավորություն չունեն: Նրանք նաև ավելացրել են, որ «Աստված և բարի մարդիկ» կօգնեն տաճարին:
