«Ժառանգություն» և «Ազատ դեմոկրատներ» կուսակցությունների միջև ապահարզան չի եղել, քանի որ ամուսնություն չի եղել: Այս մասին այսօր լրագրողների հետ հանդիպմանն ասաց կուսակցության առաջնորդ Րաֆֆի Հովհաննիսյանը:
Հարցին` ճի՞շտ էր Րաֆֆի Հովհաննիսյանի` մանդատից հրաժարվելը, որը ժողովուրդն էր իրեն տվել, նա պատասխանեց, որ այդ դիտարկումը ճիշտ կլիներ, եթե ինքը մեծամասնական ընտրակարգով ընտրված լիներ: «Բայց ես համամասնականով եմ ընտրվել. դա թիմային առաջարկ է հասարակությանը: Ես հայտարարեցի, որ նախագահական ընտրություններին ընդառաջ` չեմ վերցնում մանդատը: Դա նաև իմ գնահատականն էր հերթական ոչ լիարժեք ընտրություններին»,- ասաց նա:
Րաֆֆի Հովհաննիսյանը նաև նշեց, որ երկար ամիսներ գոհ լինելով «Ազատ դեմոկրատներ» կուսակցության հետ համագործակցությունից ու համատեղ պայքարի եղանակից` այնուամենայնիվ, կային տարբեր տեսակի քաղաքական ու բարոյական պարտավորություններ, որոնք չկատարվեցին:
«Իսկ եթե որևէ մեկը կարծում է, թե ես պետք է վախենամ քաղաքական պահից, այս նախընտրական շրջանից ու ճշմարտությունը չպետք է բացահայտեմ, սխալվում է»,- հավելեց նա:
Անդրադառնալով ԱԺ «Ժառանգություն» խմբակցությունից «Ազատ դեմոկրատներ» կուսակցության անդամ Ալեքսանդր Արզումանյանին հեռացնելու վերաբերյալ հարցին` Րաֆֆի Հովհաննիսյանն ասաց, որ ինքը բարձր է գնահատում Արզումանյանին: «Ինչպես իմ գործընկեր պարոն Արզումանյանը գիտի` որպես հմուտ դիվանագետ, դիվանագիտությունն առ ոչինչ է, եթե հիմքում չլինի ճշմարտությունը: «Ժառանգության» վարչությունը և ես անձամբ «Ազատ դեմոկրատներ»-ի կամ կոնկրետ անձանց հարցը երբեք չենք քննարկել: Սա խմբակցության խնդիրն է, և ես վստահ եմ, որ խմբակցությունը նման հեռացում չի պահանջի»:
Բանախոսը նաև կանխատեսում է, որ նախագահական ընտրություններից հետո ԱԺ արտահերթ ընտրություններ կանցկացվեն: Նա նշեց, որ արդյունքում ԱԺ «Ժառանգություն» խմբակցության նախկին պատգամավորները կվերադառնան խորհրդարան:
Լուսանկարը՝ PanARMENIAN Photo-ի
