Վրացական Փոթի նավահանգստում արդեն 1 շաբաթից ավելի շարունակվող գործադուլը սպառնում է վերածվել նաև հացադուլի: Գործադուլի մասնակիցները այդ ծայրահեղ միջոցին կարող է դիմեն երկուշաբթի, քանի որ իրենց պահանջներից առայժմ միայն մեկն է բավարարվել՝ ազատ են արձակել նրանց ձերբակալված ընկերոջը: Մնացած պահանջները՝ աշխատավարձի բարձրացում, աշխատանքային պայմանների բարելավում և այլն, վարչակազմը խոստացել է քննարկել և մինչև տարեվերջ լուծում տալ, ինչին գործադուլավորները համաձայն չեն:
«Ապավեն» բեռնափոխադրող ընկերության գլխավոր տնօրեն Գագիկ Աղաջանյանն «Առաջին լրատվական»-ի հետ զրույցում հայտնեց, որ ներկայում նավահանգստի միայն 4 նավամատույց է աշխատում (դրանք վարձակալությամբ տրված են տարբեր ընկերությունների) և դրանցով բեռնաթափվում են առաջին անհրաժեշտության ռազմավարական բեռները՝ ցորեն, շաքարավազ, ալյուր, վառելիք և այլն: Այն լաստանավերը, որոնք չեն բեռնաթափվելու, այժմ նավահանգիստ չեն էլ մտնում և շարունակում են իրենց ճանապարհը դեպի Ստամբուլ, իսկ որոնք որ արդեն մտել են նավահանգիստ, այնտեղ էլ մնում են:
Աղաջանյանը տեղեկացրեց, որ բարդ իրավիճակում են հայտնվել նաև արտահանողները. այժմ արդեն 129 բեռնարկղեր՝ հանքային ջրեր, գինի, կոնյակ, քարի սալիկներ, ֆերոմոլիբդեն, պահածոներ, հյութեր և այլն, մնացել են պահեստներում և սպասում են, որ բարձվեն նավերը:
«Եթե շարժ չլինի, իրավիճակն այսպես շարունակվի, մենք դեռ մեկ շաբաթ շուկայում գների փոփոխություն չենք նկատի, սակայն դրանից հետո թե ինչ կլինի, բարդ է ասել»,- նշեց Գ. Աղաջանյանը:
