ՀՀ իշխանություններին հանգամանքներն են դրդում ՌԴ-ից բացարձակ կախվածության՝ ով էլ լինի իշխանության ղեկին: «Առաջին լրատվական»-ի հետ զրույցում այս մասին ասաց Կիևում բնակվող ռուս հայտնի լրագրող, քաղաքական վերլուծաբան, НТВ հեռուստատեսության նախկին ղեկավար, «Մոսկովյան լուրեր»-ի գլխավոր խմբագիր Եվգենի Կիսելյովը՝ անդրադառնալով հայաստանյան արտաքին քաղաքականությանն ու ՌԴ-ից կախվածությանը:
Կիսիլյովն անկեղծորեն նշեց, որ այնքան էլ ուշադիր չի հետևում հայաստանյան արտաքին քաղաքական զարգացումներին, որպեսզի ճիշտ մեկնաբանի այն: Նա նշեց, որ որքան հասկանում է՝ Հայաստանի շուրջ կա թշնամական միջավայր, ոչ այնքան բարեկամական հարևանություն, ԼՂ հակամարտություն, արտաքին աշխարհի հետ հաղորդակցության ուղիների, տնտեսական ու բնական ռեսուրսների բացակայություն, կախվածություն ՌԴ-ից այն հարցերում, ինչպիսիք են արտաքին անվտանգությունը, էներգետիկ անվտանգությունը: Ըստ նրա՝ իհարկե, այս հանգամանքները դրդում են ՀՀ իշխանություններին, ով էլ այնտեղ լինի՝ նոր, թե հին, Մոսկվայից կախվածության չափազանց բարձր մակարդակի:
«Այս պատճառով էլ տեղի ունեցավ այն կուլբիտը, որն իրականացրեց Ուկրաինայի գահընկեց իշխանությունը: Պատրաստվում էին ԵՄ-ի հետ Ասոցացման համաձայնագիր ստորագրել, հետո միանգամից փոխեցին որոշումը՝ ասելով, որ բարեկամություն ենք անելու ՄՄ-ի հետ: Ուկրաինան դա կուլ չտվեց, Ուկրաինան ապստամբեց: Թեև այդ ասոցիացիան չէր տալու արտոնություններ՝ ԵՄ անդամակցության համար: Ասոցիացիան սկզբում կհանգեցներ տնտեսական բարդությունների, մարդկանց նյութական վիճակի ժամանակավոր վատթարացման, բայց նրանք այդպես ցանկացան փոփոխությունների հասնել:
Հայաստանում դա, ինչպես ես եմ հասկանում, տեղի չունեցավ, այլ իրավիճակ էր. ցանկացած երկիր իր առանձնահատկությունն ունի»,- ասաց Եվգենի Կիսելյովը՝ հավելելով, որ հասկանում է, թե սկզբունքորեն աշխարհում չկա ոչ մի բացարձակ հաջողակ երկիր, որտեղ լինի զտարյուն ժողովրդավարություն:
Նրա խոսքով՝ ամեն դեպքում կարելի է օրինակ բերել Ասիայի առանձին երկրներին, Լատինական Ամերիկային, որոնք իրենց զարգացման որոշակի փուլերում հասել են հաջողությունների՝ միևնույն ժամանակ ապրելով ավտորիտար և նույնիսկ տոտալիտար դիկտատուրայի պայմաններում:
Նա հորդորեց չմոռանալ նաև, որ գործոններ են նաև պատմական, կրոնական, մենթալիտետային առանձնահատկությունները այն երկրների, ինչպիսիք են Թաիլանդը, Սինգապուրը, Մալայզիան, Չինաստանը, Ճապոնիան, թեև այդ երկրներն այլ քաղաքակրթությունում են: Իսկ եթե խոսենք եվրոպական, քրիստոնեական քաղաքակրթության մասին, ապա աշխարհում չկա քրիստոնեական մի երկիր, որը լինի տնտեսապես ու սոցիալապես հաջողակ և չզարգանա ժողովրդավարական արժեքների ուղով:
«Ուստի վաղ թե ուշ դա տեղի կունենա նաև Հայաստանում»,- նման կարծիք հայտնեց Եվգենի Կիսելյովը:
Կիսելյովի հետ «Առաջին լրատվական»-ի ամբողջական հարցազրույցը՝ շուտով:
