Երեկ առավոտյան ԵՊՀ-ի մոտից ոստիկանության Կենտրոնի բաժին են բերման ենթարկվել «Հակահակահարված» նախաձեռնության անդամներ Թաթուլ Սարոյանը և Արտակ Գևորգյանը, որոնք հայտնի են ոստիկանական բռնությունների և քաղաքական հալածանքների դեմ կազմակերպվող յուրօրինակ ակցիաներով: Ըստ «Հայկական ժամանակ»-ի` նրանք բերման են ենթարկվել ստորգետնյա անցումներից մեկում «սթրիթ արտի» ոճով պլակատ կպցնելու համար: Պլակատը պատկերում է երկու ոստիկանների, որոնք ծեծում են մի երիտասարդի: Ակնհայտ է, որ իր որակով, արտաքին տեսքով, կատարմամբ` պլակատը շահեկանորեն առանձնանում է Երևանի պատերին առկա տասնյակ հազարավոր անիմաստ գրառումներից, նույնքան պլակատներից և առքուվաճառքի միլիոնավոր հայտարարություններից: Դրանց կողքին այս պլակատը հաստատ գոյության իրավունք ունի: Բայց երիտասարդները բերման են ենթարկվել ոստիկանություն:
Ուղիղ մեկ տարի առաջ `2011 թվականի նոյեմբերի 1- ին ՀՀ ոստիկանապետ նշանակված Վովա Գասպարյանը փորձում էր հանրությանը ներշնչել, թե իր շնորհիվ ոստիկանությունն արդեն փոխվել է, այլևս իրենք մենթեր չեն, քաղաքականությամբ չեն զբաղվում և պահպանում են օրինականությունը: Հիմա ինչպե՞ս գնահատել վերը նկարագրված միջադեպը: Ոստիկանները պատից պոկել են միայն այդ պլակատը և ոչ մի ուշադրություն չեն դարձրել, թե ինչեր են փակցված դրա մերձակայքում: Հայտնի չէ գոնե մի դեպք, որ ոստիկանները պատերից պոկեն, այսպես ասած, իշխանամետ որևէ թղթի կտոր: Հայտնի չէ մի դեպք, որ ոստիկաննեիը բերման ենթարկեն այդպիսի թղթի կտորներ փակցնող որևէ անձի: Եվ ուրեմն` ի՞նչ է ստացվում: Ստացվում է, որ պլակատը պոկելով և երիտասարդներին բերման ենթարկելով` իրենց ոստիկան պատկերացնողներն ապացուցում են, որ չնայած ակտիվ PR-ին` իրենք նույն մենթերն են մնացել: Նաև ապացուցվել է, որ պլակատի բովանդակությունն ամբողջությամբ արդիական է: Երիտասարդներն ազատ են արձակվել մոտ հինգ ժամ անց: Քաղաքի փողոցներն «աղտոտելու» համար նրանք ենթարկվել են վարչական տույժի:
Բերման ենթարկելու ոստիկանական օպերացիան գլխավորել է«Մարտի 1»-ի գործով ծավալուն ցուցմունքներ շարադրած և դրանից հետո կոչումի բարձրացում ստացած ոստիկանության մայոր Վարդան Գևորգյանը: Երեկ երեկոյան համացանցում հայտնվեց և լայնորեն տարածվեց երիտասարդներին բերման ենթարկելու գործողության տեսաձայնագրությունը, որտեղ արձանագրվածով ապացուցվում է ողջ վերոշարադրյալը:
