«Ավելի լավ է դաս չքաղենք Հոկտեմբերի 27-ից. ողբերգության հետևանքը ոչ միայն անհանդուրժողականությունն էր, այլև այստեղ քաղաքական շատ լուրջ դրդապատճառներ կային՝ և՛ ներսի, և՛ դրսի հետ կապված: Միակ դասն այն պետք է լինի, որ պետական կառավարման մարմինը պետք է աշխատի համագործակցային սկզբունքների վրա, իրար վստահեն, և որևէ մեկը մյուսի թիկունքում վատ բաներ չխոսի կամ համաձայնությունների չգա»,- «Կենտրոն» հեռուստաընկերության «Հայկական ուրբաթ» հաղորդման եթերում ասել է «Ժառանգություն» կուսակցության վարչության անդամ Անահիտ Բախշյանը՝ խոսելով Հոկտեմբերի 27-ի դասերի մասին:
Այդ օրերին, տիկին Բախշյանի խոսքերով, պետության ճակատագիրը օդից էր կախված: «Այն, ինչ կատարվեց այդ օրերին, լուրջ հետևանք կարող է թողել մեր պետության վրա. ինչ-որ ուժեր ուզում են սասանել մեր պետության հիմքերը, բայց մենք դա թույլ չենք տա»,- հիշել է Անահիտ Բախշյանը 1999 թ. հոկտեմբերի 30-ին ասած իր խոսքերը՝ նշելով, որ թեև իր ամուսինը ևս Հոկտեմբերի 27-ի զոհերի թվում էր, սակայն ողբերգությունը միայն անձնական չէր:
Ա. Բախշյանի խոսքերով՝ պետք է լինեն անձինք, որ պետական շահը վեր դասեն ամեն ինչից:
Լրագրող Հարություն Հարությունյանն էլ նշել է, որ Հոկտեմբեր 27-ը հենց այնպես չստացվեց. «Դրանից առաջ արդեն հասարակությանը նախապատրաստում էին: Այդ անհանդուրժողականության մթնոլորտը կար Հոկտեմբերի 27-ից առաջ»: Ա. Բախշանի այն դիտարկմանը, թե Հանրային հեռուստաընկերությունը նպաստեց թե՛ Հոկտեմբերի 27-ի, թե՛ Մարտի 1-ի դեպքերի կայացմանը, Հարություն Հարությունյանը, ով այդ ժամանակներում Հանրային հեռուստաընկերությունում էր աշխատում, նշել է, որ Հանրայինը չէ, որ Հոկտեմբերի 27-ի կամ Մարտի 1-ի համար մեղավոր է. «Հոկտեմբերի 27-ից հետո եղել է մի շրջան, որ ես անազատության մեջ եմ եղել՝ կեղծ ցուցմունքի հիման վրա, երբ դուրս եկա, իմացա, որ մի քանի լրագրողներ ստացել են 700 դոլար կանխիկ գումար ամեն ամիս, որ ուղղորդեն իրենց նյութերը: Նրանք ոչ Հանրայինի աշխատակիցներ էին, ոչ էլ թերթի խմբագիր: Նրանք ուղորդում էին ժողովրդի և զոհերի հարազատներին: Փող էր պետք, անում էին»:
՛
«Ազգային միացյալ նախաձեռնության» համակարգող Շանթ Հարությունյանն էլ ասել է, որ Հոկտեմբերի 27-ը անհանդուրժողականության հետևանք չէր, պետության հիմքերն էլ դրսից չէին սասանում: Հոկտմբերի 27-ին պետությունը չեն գլխատել: Պետությունը գլխատվեց անկախությունից ի վեր, երբ կեղծվեցին ընտրությունները: Ընտրությունները կեղծողներն են պետությունը գլխատել: Ես Վազգենին հարգում եմ, հետը աշխատել եմ, բայց երբ ասաց, որ հարյուր տոկոս ձայն էլ ընդդիմությունը հավաքեր, իշխանությունը չէինք զիջի, այդտեղ պետությունը մեռավ: Դա նշանակում է, որ երեք միլիոն բնակիչ ստրուկ է»: Շանթ Հարությունյանը դաս է համարում օտար պետություններին, առաջին հերթին Ռուսաստանի կայսրությանը չծառայելը, որի ԿԳԲ-ն, նրա խոսքերով, Հոկտեմբերի 27-ին պաշտոնյաներին գնդակահարեց, Մարտի 1-ին՝ ժողովրդին:
