Քաղաքապետարան-մասնավոր հատված համագործակցության շրջանակում այս անգամ համատեղ նախաձեռնությամբ են հանդես եկել Երևանի քաղաքապետարանը, «Կոկա Կոլան», «Վիստա պլյուս» ՍՊԸ-ն և «Սելա» մասնագիտական ցանցը:
Մեկնարկում է «Եղիր ակտիվ, ապրիր առողջ» ծրագիրը, որի մանրամասները ներկայացրել են Երևանի քաղաքապետի խորհրդական Սամվել Մերթարջյանն ու «Կոկա-Կոլա Հելլենիկ Բոթլինգ Քամփնի Արմենիա» ՓԲԸ-ի գլխավոր տնօրեն Գագիկ Դանիելյանը: «Եղիր ակտիվ, ապրիր առողջ» ծրագրի հիմնական նպատակն է տարբեր նախաձեռնությունների միջոցով խթանել առողջ ապրելակերպը: Այդ համատեքստում, մայիսի 18-ին, ժամը 10:00-ին Ստ. Շահումյանի անվան հրապարակից կմեկնարկի հեծանվամարաթոն, որը կանցնի քաղաքի մի շարք կենտրոնական փողոցներով ու կավարտվի դարձյալ Ստ. Շահումյանի հրապարակում: Միջոցառմանը կարող են մասնակցել հեծանիվ ունեցող բոլոր ցանկացողները: Իսկ հեծանիվ չունեցողներին այն կտրամադրի սիրողական հեծանվային սպորտի ֆեդերացիան: Երևանի քաղաքապետի օգնական Սամվել Մերթարջյանը, ի հավելումն թեմայի, նշել է, որ, հաշվի առնելով հեծանվային տրանսպորտի նկատմամբ աճող հետաքրքրությունը, Երևանի քաղաքապետ Տարոն Մարգարյանի հանձնարարությամբ քաղաքապետարանը, սկսած 2012 թվականից, ոլորտի մի շարք կազմակերպությունների հետ հեծանվային մշակույթի զարգացման ուղղությամբ բազմաթիվ ծրագրեր է կյանքի կոչել: «Կանաչաստան» ՀԿ-ի հետ ստեղծվեցին առաջին հեծանվուղին և հեծանվային կանգառները: Այժմ էլ հեծանվային սպորտի սիրողական մարզիկների ու ճանապարհային ոստիկանության հետ համատեղ կազմվել է աշխատանքային խումբ, որը մշակել է հեծանվային 2-րդ ճանապարհը: Ընթանում են նախագծի նախապատրաստական աշխատանքները: Հեծանվուղին ներառվելու է փողոցային երթևեկության մեջ`հետագայում դեպի այլ ուղղություններ ընդլայնվելու հեռանկարով: Երթուղին հետապնդելու է նաև հեծանվային տուրիզմը խթանելու նպատակ: Մինչ այդ, մայիսի 8-ից մեկնարկում է «Եղիր ակտիվ, ապրիր առողջ» կարգախոսով տեղեկատվական քարոզարշավը, որը կլուսաբանվի տարբեր զանգվածային լրատվամիջոցներով:
