2013 թ. բյուջեի նախագծով գիտությանը հատկացվող 11.2 մլրդ դրամը ՀՆԱ-ի 0.246%-ն է։ Ինչպես այսօր ԱԺ հանձնաժողովներում քննարկումների ժամանակ հայտարարեց պատգամավոր Հրատ Բագրատյանը, առաջիկայում կառավարությունն ու ԱԺ-ն հնարավորություն կունենան մի օրենսդրական նախաձեռնություն ևս մերժել, այն, որ գիտության ֆինանսավորումը պետք է լինի 1%։
Ըստ Բագրատյանի՝ զբոսաշրջիկների փոխարեն պետք է գիտնականների խմբեր լինեն ՀՀ-ում։ Պատգամավորը հայտարարեց, եթե իշխանությունն ուզում է գիտելիքահեն տնտեսություն ստեղծել, պետք է ավելացնել գիտության ֆինանսավորումը, գոնե 5 տարի առաջվա բյուջեի կառուցվածքը պահպանել։
«Ինչպե՞ս կարելի է անընդհատ պակասեցնել այս ուղղությամբ հատկացումները։
Գյուղատնտեսությունից ավելի շատ է արտադրում։ Պետք է տաք, որ ստանաք։ Այստեղ է արտադրվում ամենաշատ ավելացված արժեքը»,- շեշտեց Հ. Բագրատյանը՝ հավելելով, որ բյուջեի եկամուտները կարող էին ավելի շատ լինել, բայց այս պայմաններում անգամ բաշխումը ճիշտ չի կատարվել;
Ֆինանսների փոխնախարար Պավել Սաֆարյանը համաձայնեց, որ, իհարկե, գիտությանը պետք է ավելի շատ հատկացվեր, որևէ առարկություն այստեղ չկա, սակայն չկիսեց 1% սահմանելու կարծիքը։ Նրա խոսքով, բյուջեում տոկոսների նախատեսումը ընդունելի պրակտիա չէ, այլապես մեխանիկորեն բաժանում կարվեր, և տոկոսների ամրագրումը միշտ խնդիրներ է առաջացրել։ «Դա խանգարում է կառավարությանն ու ԱԺ-ին ճիշտ որոշում ընդունել։ Տոկոսներին չեմ էլ ուզում անդրադառնալ, պարզ է, որ ինչքան էլ լինի, 100 %-ից չի անցնելու»,- ասաց Պ. Սաֆարյանը։
«Պարոն Սաֆարյան, ես Ձեզ հավատացնում եմ, բացարձակապես այդպես չէ, ինչպես պատասխանում եք»,- հակադարձեց Հ. Բագրատյանը։
Պատգամավորի խոսքով, ՀՀ բյուջեն 90 էջից դարձել է 3000, իսկ ԱՄՆ բյուջեն 20 հազ. էջ է։ Բագրատյանը նշեց, որ ՀՀ բյուջեում ծախսեր կան, որ կարելի է 100 %-ով հանել, մեզ մոտ պարտադիր են համարում ՊՆ և ազգային անվտանգության ոլորտները, իսկ ԱՄՆ-ում՝ սոցիալական ուղղությունները։
Ֆինանսավարկային և բյուջետային մշտական հանձնաժողովի նախագահ Գագիկ Մինասյանը նկատեց, թե առաջարկը պետք էր անել համապատասխան հարցի՝ ՊՆ ոլորտի քննարկման ժամանակ։
«Ձեր արած դիտողությունը չի համապատասխանում հարցի էությանը»,- նկատեց Հ. Բագրտյանը՝ նշելով, որ ՊՆ ֆինանսավորման քննարկման ժամանակ ինքը հատուկ չի առաջարկել կրճատումներ անել:
«Սաֆարյանն ասաց՝ ես իրեն չհասկացա: Հիմա ես իրեն բացատրե՞մ, թե՞ չէ»,- հարցրեց Բագրատյանն ու բացատրեց, որ գիտության ֆինանսավորման թիվը ֆիքսված է աշխարհի շատ երկրներում, և դրանից վախենալու կարիք չկա, և հարկավոր է դադարել այս ոլորտին նայել որպես մնացորդային ոլորտի։
Լուսանկարը PanARMENIAN Photo-ի
