Տավուշի մարզի ընդհանուր իրավասության դատարանում՝ դատավոր Զոյա Զաքինյանի նախագահությամբ, այսօր տեղի ունեցավ Լյուքս Ստեփանյանի գործով դատական նիստը:
Դատախազ Արթուր Զաքարյանն ընթերցեց մեղադրական ճառը՝ սկսելով նախապատմությունից, նախաքննության փուլից, նախաքննության և դատարանում հնչեցրած ցուցմունքներից: Նա միջնորդեց ամբաստանյալ Դավիթ Խաչատրյանին մեղավոր ճանաչել ՀՀ քրեական օրենսգրքի 104 հոդվածի 2-րդ մասի 6-րդ կետով և 112-րդ հոդվածի 1-ին մասով. առաջին հոդվածով Դավիթ Խաչատրյանին դատապարտել 14 տարվա ազատազրկման, երկրորդով՝ 4 տարվա, ընդհանուր առմամբ՝ 18 տարվա ազատազրկման:
Ամբաստանյալ Դավիթ Խաչատրյանն առարկեց՝ նշելով. «Դատաքննության ընթացքում լիքը ապացույցներ են հայտնաբերվել, որոնք դուք անտեսում եք: Ինձ դատեք իմ արածի համար, ոչ թե չարածի համար: Ես ինձ մեղավոր չեմ ճանաչում և հենց այս պահից հայտարարում եմ հացադուլ»:
Սա առաջացրեց Լյուքս Ստեփանյանի հարազատների, ինչպես նաև մոր՝ Լուիզա Ստեփանյանի զայրույթը: Վերջինս նշեց, որ ի սկզբանե պահանջը մեկն էր՝ ցմահ ազատազրկում: Դիմելով Դավիթ Խաչատրյանին՝ նա ասաց. «Ինձ ի՞նչ պատասխան ես տալու այդ մի տարվա համար, պատասխանի՛ր իմ հարցին: Գիտես, ես ընդունո՞ւմ եմ այն մեղադրանքը, որ տվել ես տղուս: Իմ տղան հայհոյե՞լ է, գիտես, ես ընդունո՞ւմ եմ քո ասածը: Փոխանակ ներողություն խնդրես և ասես, որ իսկապես Լյուքսն այդպիսի տղա չէ, որ գովասանքի է արժանի, ոչ մի անգամ չբարեհաճեցիր ներողություն խնդրել: Հիմա կանգնել ու ասում ես՝ ես ինձ մեղավոր չեմ ճանաչում: Գլուխդ պատով ես տվել: Ես սկզբից էլ ասել եմ՝ կամ ցմահ ազատազրկում, կամ մահ: 18 տարին իմ վիճակը չի մեղմացնի, տարիները չեն փրկի, միայն մահը, մահը կփրկի»,- ասաց Լուիզա Ստեփանյանը:
Դավիթ Խաչատրյանի պաշտպան Վաղինակ Գևորգյանը նշեց, որ իրենք այս պահին պատրաստ չեն, և 20 աշխատանքային օր խնդրեց:
Հաջորդ դատական նիստը կկայանա մայիսի 30-ին, ժամը 12-ին: Ի դեպ, Վաղինակ Գևորգյանի կողմից 20 աշխատանքային օր խնդրելը հարուցեց Լյուքս Ստեփանյանի հարազատների զայրույթը: Թե դատարանի նիստերի դահլիճում, թե դատարանից դուրս նրանք շարունակում էին զայրացած խոսել ու պահանջել ցմահ ազատազրկում, անգամ ցուցապաստառներ էին բերել: Ինչպես միշտ, դատարանը լեփ-լեցուն էր Լյուքս Ստեփանյանի հարազատներով:
