Եվրոպական ընտրություններից հետո փորձելու ենք գտնել ՀՀ-ԵՄ համագործակցության փոխընդունելի ուղին: Այսօր լրագրողների հետ հանդիպման ժամանակ այս մասին ասաց ՀՀ ԱԺ Արտաքին հարաբերությունների հանձնաժողովի ղեկավար, ՀՀԿ ներկայացուցիչ Արտակ Զաքարյանը՝ խոսելով ՀՀ-ԵՄ հարաբերությունների շուրջ:
Նա նշեց, որ ԵՄ-ի հետ ՀՀ հարաբերությունները Հայաստանի քաղաքական օրակարգի առաջնահերթություններից են, և ՀՀ-ն փորձելու է առաջիկայում՝ Եվրոպայում խորհրդարանական ընտրություններից հետո նոր ձևավորվող քաղաքական ուժերի հետ գտնել ՀՀ-ԵՄ երկուստեք ընդունելի ճանապարհը, որը Հայաստանին հնարավորություն կտա իրացնել իր հանձնառությունները ինչպես երկկողմ, այնպես էլ բազմակողմ ձևաչափով:
Ըստ նրա՝ ՀՀ-ն, ունենալով փակ սահմաններ, կիսով չափ ունենալով տնտեսական շրջափակում, կոնֆլիկտային հարաբերություններ հարևան Ադրբեջանի հետ՝ համաշխարհային քաղաքականության մեջ շարունակելու է իր բազմավեկտոր քաղաքական կուրսը և հավասարակշռված քաղաքականությունը: Սակայն նա նաև ասաց, որ Եվրոպայի պատժամիջոցների քաղաքականությունն անընդունելի է համարում, քանի որ այդ խնդիրներն ունեն քաղաքական լուծման հնարավորություններ:
«Այսօր ունենք ՀՀ-ԵՄ համագործակցության չիրացված պոտենցիալ ոչ միայն քաղաքական, այլև հումանտիտար, մշակութային, կրթական ոլորտներում»,- հստակեցրեց նա:
Հարցին, թե հնարավո՞ր է արդյոք, որ Հայաստանը ստորագրի Ասոցացման համաձայնագրի քաղաքական բաղադրիչը, նա պատասխանեց՝ այդ մասին հիմա պետք չէ խոսել, քանի որ ապագայում ինչ փաստաթուղթ էլ ծնվի, ինչ անվանում էլ ունենա փոխշահավետ հիմքերի վրա է լինելու:
«ՀՀ-ն ԱլԳ հիմնադիր անդամ է, իր քաղաքականության հիմքում տեսնում է ԵՄ-ի հետ համագործակցությունը խորը և երկարատև երկխոսության մեջ: Հայաստանն արդեն իսկ աշխատում է այդ ուղղությամբ, կա աշխատանքային խումբ, որն արդեն աշխատում է պոտենցիալներն իրացնելու համար»,- ասաց նա:
Լուսանկարը` PAN Photo-ի
