Մադրիդի «Ռեալ»-ի գլխավոր մարզիչ Կարլո Անչելոտին հայտարարել է, որ ոչ մի դժգոհություն չունի «Ռեալ»-ի հարձակման գծի ֆուտբոլիստների խաղից:
« Ինձ չի անհանգստացնում Բենզեմայի վիճակագրութունը: Նա շատ կարևոր գոլի հեղինակ դարձավ Չեմպիոնների լիգայի գավաթի խաղարկության «Բավարիա»-ի դեմ կիսաեզրափակիչ առաջին խաղում: Պատասխան խաղում նա գոլ չխփեց, բայց ֆանտաստիկ աշխատանք կատարեց ամբողջ խաղի ընթացքում:
Ընդհանրապես ոչ մի վատ բառ չեմ կարող ասել մեր հարձակման գծի հասցեին: Այս մրցաշրջանում մենք 150 գոլ ենք խփել: Հարձակման գծում բոլորը գերազանց են աշխատում, ներառյալ Քրիշտիանու Ռոնալդուն, որը 50 գոլի հեղինակ է դարձել: Այո՛, Քրիշտիանուն շատ գոլեր է խփում, բայց բոլորն էլ լավ են աշխատում»,- Անչելոտիի խոսքերն է մեջբերում Inside Spanish Football-ը:
Նշենք, որ վերջին 10 հանդիպումներում Կարիմ Բենզեման դարձել է ընդամենը 1 գոլի հեղինակ: Սակայն Իսպանիայի ընթացիկ առաջնությունում անցկացրած 33 խաղում ֆրանսիացի հարձակվողը դարձել է 17 գոլի հեղինակ: Եվս 5 գոլ Բենզեմայի հաշվին գրանցված է Չեմպիոնների լիգայի գավաթի խաղարկությունում:
