Երեկվանից վրաստանյան գործակալությունները հայտնում են, որ Ռուսաստանի համար լրտեսական գործունեություն ծավալելու մեղադրանքով ձերբակալվածների շարքում կան նաեւ ազգությամբ երկու հայեր` Արմեն Գեւորգյանն ու Ռուբեն Շիկոյանը: «Առաջին լրատվականը» քիչ առաջ զրուցեց Թբիլիսիի Հայկական ասամբլեայի համակոորդինատոր Առնոլդ Ստեփանյանի հետ, ով խիստ ուշագրավ բացահայտումներ արեց:
«Ձերբակալված անձանցից մեկը` Արմեն Գեւորգյանը, Աջարիայի հայկական միության նախկին ղեկավարն է եղել մինչեւ 2004 թվականը: Կարող եմ վստահեցնել, որ այն տեղեկությունները, թե իբր նա եղել է «Ջավախք» կազմակերպության անդամ` չեն համապատասխանում իրականությանը, նա որեւէ կապ չի ունեցել այդ կազմակերպության հետ: Մյուսի մասին տեղեկություններ չկան, նրա մասին, համենայնդեպս` հայկական համայնքը, տեղեկություններ չունի, նա ակտիվ գործունեությամբ չի զբաղվել: Իսկ ահա Արմեն Գեւորգյանի մասին կարող եմ նաեւ հավելել, որ նա մշտապես մտերիմ հարաբերությունների մեջ է եղել Աջարիայի նախկին իշխանությունների` Ասլան Աբաշիձեի հետ, իսկ այսօր, որքանով ես եմ տեղյակ` որոշակի հարաբերություններ ուներ Վրաստանի նախագահի` ազգային փոքրամասնությունների հարցերով խորհրդական Վան Բայբուրդի հետ, եւ այս առումով այս տեղեկատվությունը բոլորի համար անակնկալ էր: Ուշագրավ է նաեւ այն, որ այս ձերբակալությունները համընկան Աջարիայում մեծ հեղինակություն ունեցող Էդուարդ Սուրմանիձեի ձերբակալության հետ: Էդուարդ Սուրմանիձեն` Վրաստանի խորհրդարանի նախկին փոխխոսնակն էր եւ Զուրաբ Ժվանիայի ընկերը: Այսինքն` Էդուարդ Սուրմանիձեի եւ Արմեն Գեւորգյանի ձերբակալությունները միաժամանակ տեղի ունեցան», -հայտնեց Առնոլդ Ստեփանյանը:
Տեղեկացնենք, որ Էդուարդ Սուրմանիձեն ձերբակալվել է հոկտեմբերի 16-ին: Նա Վրաստանի խորհրդարանի երեք գուրմարման պատգամավոր է եղել, Ասլան Աբաշիձեի կուսակցության խորհրդարանական խմբի անդամ, ապա համարվել է Զուրաբ Ժվանիայի թիմի անդամ, որի ղեկավարման տարիներին էլ նրա տեղակալն է հանդիսացել:
