«Ժուռնալիստական ուտկա: Դա բժշկական խնդիր չէ, քանի որ բժշկությունը չի զբաղվում պահեստամասերով». անդրադառնալով մամուլը վերջին շրջանում հեղեղած արհեստական կուսաթաղանթների չարչրկված հարցին՝ այսպես բնորոշեց այդ երևույթի նկատմամբ հետաքրքրությունը գինեկոլոգ Գեորգի Պողոսյանը: Նա կատակով նշեց, թե իրեն էլ է հետաքրքրում՝ ո՞ւր է այդ կես տոննա արհեստական կուսաթաղանթը:
«Մեկուկես տարի առաջ դրանք վաճառվում էին մի խանութում, սակայն այդ խանութը փակվեց՝ երևի պահանջարկ չկար»,- ասաց նա:
Սեքսապաթոլոգ Վրեժ Շահրամանյանն էլ իր հերթին նշեց` ցավոք, արհեստական կուսաթաղանթների թեման դարձել է շատ քննարկվող, որին հաջորդում են անլուրջ վերլուծականներ, և անառողջ քննարկումների պատճառով այն վերածվում է իսկական շոուի:
Գ. Պողոսյանը հավելեց, թե պետք չէ այդ հարցը քննարկել, քանի որ դա ծիծաղելի է: «Կարծես թե ամեն ինչ լավ է մեր երկրում, այդ հարցն է մնացել բաց՝ բոլոր պարերը պարել ենք, մնացել է Սարի սմբուլը»,- կատակով նշեց գինեկոլոգը:
Ինչ վերաբերում է վիրահատական եղանակով կուսությունը վերականգնելու դեպքերին, ապա վերջինս հավելեց, որ բժիշկները, օգնելով այդ քայլին գնացող կանանց, օժանդակում են խաբեությանը:
«Կանայք, որոնք դիմում են այդ քայլին, իրենց կյանքը սկսում են խաբեությամբ: Պետք է ասել ճշմարտությունը ու ոչինչ չհիշել»,- ասաց գինեկոլոգը՝ հավելելով, թե այդ վիրահատությունները օրենքով արգելված են, դրանք «կրիմինալ գործողություններ են», և բացի այդ` կարող են առաջանալ նաև բարդություններ:
Լուսանկարը՝ PanARMENIAN Photo-ի
