Այս ամռանը կառավարության որոշմամբ Ընտանեկան օրենսգրքում փոփոխություններ կատարվեցին, որով սահմանվեց կանանց և տղամարդկանց ամուսնության միևնույն տարիքը՝ 18 տարեկան: Անդրադառնալով այս փոփոխությանը՝ սեքսապաթոլոգ Վրեժ Շահրամանյանը այն համարեց «բժշկական առումով ողջամիտ որոշում», որը մեզանում հավասարեցրել է ամուսնացողների տարիքը, բացի այդ` 17 տարեկան աղջիկը մեզանում դեռ դպրոց է հաճախում:
«Տարիքային առումով շատ մեծ փոփոխություն չի կատարվել՝ 17-ը դարձել է 18, սակայն հարցն այստեղ այլ է՝ թե անձը հոգեբանորեն որքանով է պատրաստ ամուսնությանը, ընտանիք կազմելուն»,- նշեց նա՝ ընդգծելով, որ 17 տարեկան աղջիկը դեռ սեռահասուն չէ, քանի որ կնոջ ոսկրային համակարգը լիովին ձևավորվում է 18 տարեկանից հետո:
Գինեկոլոգ Գեորգի Պողոսյանի խոսքով՝ հղիանալու համար կնոջ լավագույն տարիքը 18-30-ն է, իսկ սեռական կյանքով զբաղվելը միանգամայն այլ է՝ հնարավոր է անգամ 14 տարեկանից: «Հայաստանում նման դեպքեր եղել են»,- նշեց նա:
Ըստ սեքսապաթոլոգի` սեռական կյանքով զբաղվելու նպաստավոր տարիքը շատ հարաբերական է, անհատական, սակայն խորհուրդ է տրվում դրանով զբաղվել 18 տարեկանից հետո, քանի որ կարող են խնդիրներ առաջանալ՝ հիասթափություններ և այլն:
Գ. Պողոսյանն էլ իր հերթին մատնանշեց Սկանդինավյան երկրների օրինակը, որտեղ պահպանակներ են բաժանում 13-14 տարեկան երեխաներին, ինչը նորմալ է համարվում այդ երկրների համար, բայց մեզանում միանշանակ չի կարող ընդունվել:
