«Առողջապահության պարտադիր ապահովագրության գնալը իր մեջ շատ վտանգներ է պարունակում»,- այսօր ԱԺ մշտական հանձնաժողովների համատեղ նիստում հայտարարեց պատգամավոր Հրանտ Բագրատյանը՝ միաժամանակ գովելով ծննդօգնության ոլորտում սերտիֆիկատների ներդրումը:
Նա օրինակ բերեց ԱՄՆ-ը, որը ավելի լիբերալ է, բայց առողջապահության ոլորտում սոցիալիստ է, իսկ այդ երկրի նախագահները խոստանում են ու այդպես էլ չեն կարողանում առողջապահության ոլորտում ռեֆորմ անել: «Պարտադի՞ր է, որ մենք գնանք դրան: Դա կբերի ծախսերի ու ինքնարժեքի բարձրացման»,- հարցադրում արեց Հ. Բագրատյանը՝ նաև հետաքրքրվելով, թե որքան հարկ է վճարում առողջապահությունը, որը հսկայական արտադրություն է:
Հ. Բագրատյանը նաև մատնանշեց ապահովագրությամբ հավաքագրված վճարների ներդրումային ռիսկերը, քանի որ կուտակային կենսաթոշակը երկրից գնալու է դուրս:
Առողջապահության նախարար Դերենիկ Դումանյանը մանուկների բժշկության ոլորտում սերտիֆիկատների կիրառումը լուրջ հաջողության համարեց և նշեց, որ դա 4-5 անգամ նվազեցրեց ստվերը՝ այն 90%-ից իջավ 7-8%-ի, չնայած սա էլ մտահոգիչ է: Նրա խոսքով՝ մի խնդիր կա. ծնունդները մարզերից գալիս էին Երևան, ինչի պատճառով տեղայնացման ծրագիր է իրականացվելու:
Ըստ նախարարի՝ պետք է կատարվի սոցիալական խմբերի սերտիֆիկացում, քանի որ սոցծրագրերի մեջ ներառված են նաև հաշմանդամները, որոնցից շատերը սոցիալական խնդիր չունեն. «Այստեղ բաժանման խնդիր է դրվում, որ սերտիֆիկատը տրվի մարդուն, որ իր ցանկացած բուժհիմնարկում բուժում ստանա: Մարդիկ չեն վախենա հիվանդանալուց, և հոսքը հիվանդանոցներ կավելանա»:
Դ. Դումանյանը տեղեկացեց, որ ապահովագրության հարցով հանձնաժողով են ստեղծել` ուսումնասիրելու, թե ինչ բարդություններ կարող են լինել, համեմատելու են սոցփաթեթով տեղադրված միջոցների արդյունքները:
Նախարարը հայտնեց, որ սոցփաթեթով առողջապահության համակարգ մուտք է եղել մոտ 800 մլն դրամ: Մյուս տարի սպասվում է 4 մլրդ, և այդ գումարների առկայության դեպքում հնարավոր կլինի վերաձևակերպել ծրագրերը և ուղղել սոցիալապես անապահով խմբերին ու նրանց համար կատարել լրացուցիչ ծրագրեր:
Լուսանկարը՝ PanARMENIAN Photo-ի
