Երկուշաբթի օրը Եվրոպական հանձնաժողովը հրապարակել է տնտեսական նոր կանխատեսում, որում եկող տարվա համար եվրոգոտու իրական ՀՆԱ-ի աճի գնահատումը ձմեռվա կանխատեսման համեմատ նվազեցրել է 0,1 տոկոսով՝ 1,8%-ից 1,7%, հայտնում է Ria Novosti-ն:
«ԵՄ-ի և եվրոգոտու ՀՆԱ-ն, ինչպես սպասվում է, կշարունակի վերականգնվել կանխատեսումների ընդգրկած տարիների ընթացքում: Աճը կտարածվի երկրներով՝ ներքին պահանջարկի ամրապնդման առումով դառնալով ավելի ինքնուրույն: Տնտեսական աճին, նախկինի պես, կխոչընդոտեն մասնավոր և պետական մեծ պարտքը, ֆինանսական մասնատումը, անորոշությունն ու բարդ ծրագրերը (պետբյուջեների դեֆիցիտի կրճատման ուղղությամբ): Եվս մի քանի եռամսյակ կանցնի, մինչև ՀՆԱ-ն վերադառնա 2008 թվականի նախաճգնաժամային մակարդակին»,- ասվում է փաստաթղթում:
Միևնույն ժամանակ, ընթացիկ տարվա գնահատականը չի փոխվել՝ 1,2% աճ: Ըստ Եվրահանձնաժողովի՝ անցած տարի ՀՆԱ-ն կրճատվել է 0,4%-ով, այդ գնահատականը ևս չի փոխվել:
Միևնույն ժամանակ, Եվրահանձնաժողովը լավացրել է եվրոգոտում գործազրկության հետ կապված կանխատեսումը՝ չնայած ցուցանիշները, ինչպես նախկինում, բավական բարձր են: Հիմա ընթացիկ տարվա համար կանխատեսումը, ձմեռվա կանխատեսման 12%-ի փոխարեն, 11,8% է, հաջորդ տարվա համար կանխատեսվել է 11,4%՝ 11,7%-ի փոխարեն: Եվրահանձնաժողովը նաև նշել է 2013-ին գործազրկության գնահատումը՝ 12%՝ 12,1%-ի փոխարեն:
Եվրահանձնաժողովը բարձրացրել է 2014-ի համար ԵՄ-ի ՀՆԱ-ի կանխատեսումը՝ մինչև 1,6%՝ 1,5%-ից, 2015-ի համար թողել է 2%: Անցած տարում ԵՄ-ի տնտեսությունն աճել է 0,1%-ով, կարծում է Եվրահանձնաժողովը, այդ գնահատականը չի փոխվել:
