«Տպավորված եմ Ձեր պատասխաններից, բայց կառավարությունը առկա հնարավորությունների պարագայում չի գտել ճիշտ լուծումները»,- այսօր ԱԺ առողջապահության, մայրության և մանկության ու ֆինանսավարկային և բյուջետային մշտական հանձնաժողովների համատեղ նիստում 2013 թ. բյուջեի քննարկումների ժամանակ հայտարարեց պատգամավոր Հրանտ Բագրատյանը։
Նշելով, որ այս տարի սոցիալական փաթեթ է իրականացվել 120 հազար մարդու համար, հաջորդ տարվա համար այդ թիվը 30 հազարով կավելանա, Հ. Բագրատյանը հետաքրքրվեց ֆինանսների փոխնախարար Պավել Սաֆարյանից, թե այդ գումարը բյուջեում որտե՞ղ է արտահայտվել, նաև հետաքրքրվեց, թե փոխնախարարն ինչպե՞ս է վերաբերվում ԱՊՊԱ-ին, որը ի սկզբանե եղել է մոնոպոլ, և հիմա դրան ավելացել է առողջապահության ապահովագրությունը, որտեղ նույնպես գները որոշում է Կենտրոնական բանկը, այսինքն՝ ի վերուստ ինչ-որ մարդկանց շահույթներ են ապահովվում։ «ԱՊՊԱ-ի 10% շահույթի մասին է ասվում, որը կբավարարեր թոշակների բարձրացման համար»,- նկատեց պատգամավորը։
Պ. Սաֆարյանը նշեց, որ հատկացումները փաթեթով 1.5 մլրդ-ով ավելացել են նախորդ տարվա համեմատ, սոցփաթեթում առողջապահության մասնաբաժինը արտացոլված է սոցիալական ծախսերի մեջ և հատկացումների կեսից ավելին առողջապահության ծախսերն են։ Ըստ նրա՝ շատ էական չէ, թե որ դասակարգման մեջ է այդ ցուցանիշը, և եթե առաջարկ լինի, կարելի է փոխել։
Պ. Սաֆարյանը փորձեց խուսափել կամ հետաձգել հարցի քննարկումը՝ նշելով, որ ապահովագրության հարցը սոցիալական ոլորտի քննարկման ժամանակ է ներկայացվելու, և ճիշտ կլիներ՝ այն ժամանակ անդրադառնային այդ հարցին։ Ի վերջո, փոխնախարարը տեղեկացրեց, որ սոցփաթեթից օգտվողների շրջանակն ընդլայնվել է՝ ընդգրկվել են նաև հավաքարաներին, տեխնիկական աշխատողներին։ Պ. Սաֆարյանի խոսքվ՝ մոտ 10 մլրդ դրամ կգնա առողջապահությանը, և ոլորտը ՀՆԱ մեջ 1.54%-ից հաջորդ տարի դառնալու է 1.55%։
Սաֆարյանը կարևոր խնդիրներից մեկը համարեց առողջապահությանն ավելի շատ գումարներ հատկացնելը. 20-30 մլրդի կարիք կա, որպեսզի մոտենանք աշխարհի միջիններին։ Ըստ փոխանախարարի՝ սոցիալական անապահով մի խավ կա, որ առողջապահական ծրագրերից չի օգտվում, իսկ նրանց ծրագրերում ընդգրկելու համար մոտ 4 մլրդ դրամ է պահանջվում։
Հ. Բագրատյանը նկատեց, որ զարգացած երկրներում առողջապահությունը ՀՆԱ մեջ 15% է. «Իմ հաշվարկով՝ Հայաստանում 4.5% է ծախսվում ՀՆԱ-ի, քանի որ 3%-ը բնակչությունն է ծախսում»։
Լուսանկարը՝ PanARMENIAN Photo-ի
