«2008 թ. նախագահական ընտրություններից հետո ընդդիմությունն այդպես էլ չկարողացավ վերաիմաստավորել իր տեղը և ժամանակի ընթացքում կորցրեց կողմնակիցների մեծ մասին: Սա բերեց հոռետեսության, մեծացավ արտագաղթը: Այսօր հերթական նախագահական ընտրություններին մոտենում ենք հուսալքության և հոռետեսության մթնոլորտում»,- «Կենտրոն» հեռուստաընկերության «Ուրվագիծ» հաղորդման եթերում ասել է քաղաքագետ Արման Մելիքյանը:
Նախագահի նախկին թեկնածուի խոսքերով՝, նախորդ նախագահական ընտրության ժամանակ ժողովուրդն ուներ մեծ պատրանքներ ընդդիմադիր ուժերի նկատմամբ, այսօր հանրությունը քաղաքական ուժերի հետ որևէ հույս չի կապում: «Քաղաքական ուժերը գնացին գործարքների, ընդդիմությունը` գործարքների և ներքին տրոհումների ճանապարհով»,- ասել է Արման Մելիքյանը և եզրակացրել, որ խորհրդարան անցած ուժերից որևէ մեկը չի կարող սեփական թեկնածուով հանդես գալ նախագահի ընտրություններում և հաղթել, եթե անգամ արդար ընտրություններ անցկացվեն:
Համեմատություն անցկացնելով ԲՀԿ-ի և ՀԱԿ-ի ընտրազանգվածի միջև, Արման Մելիքյանը նշել է, թե չի հավատում ԲՀԿ-ի ընտրազանգվածի իրական լինելուն. «Բարգավաճ Հայաստան»–ի աջակիցներին մենք փողոցում չենք տեսել, Լևոն Տեր-Պետրոսյանի աջակիցներին տեսել ենք: Այսինքն, այն թվերը, որ ներկայացված են խորհրդարանում, ես չեմ հավատում: Կա քվե, որը չի արտացոլում իրական պատկերը: Ես մեծ վերապահումով եմ վերաբերվում ցանկացած համապետական ընտրությունների թվական պատկերին: 91 թվականից հետո Հայաստանում արդար ընտրություն չի անցկացվել»:
Արման Մելիքյանն անդրադարձել է նաև նախկին արտգործնախարար Վարդան Օսկանյանի նկատմամբ քրեական գործ հարուցելու թեմային` ասելով, որ այդ դեպքը եզակի չէ, խնդիրներ կան նաև առողջապահության, քաղաքաշինության ոլորտներում, որոնցում կոռուպցիոն խնդիրներ են ի հայտ եկել: Սակայն, ըստ նրա, իշխանական համակարգն ամբողջությամբ կոռումպացված է, իսկ գործերի հարուցումը կատարվում է ընտրողաբար, ինչը նախընտրական իմաստ է ստանում. «Հայաստանում արդարադատության ոլորտը դեֆորմացված է, և թիրախային այս քայլերը իշխանության ինքնագովազդի դեր են խաղում: Երբ արդարադատությունը ընտրողաբար է կիրառվում, մենք չենք կարող խոսել իրավական պետության մասին»: Վազգեն Խաչիկյանի ձերբակալությունն էլ Արման Մելիքյանը համարում է ՀՀԿ-ի վարկանիշը բարձրացնելու քայլ: Այնինչ, ըստ նրա, համակարգային փոփոխություն է պետք մեր երկրում:
Արման Մելիքյանը նշել է, թե իրականում մարտի մեկի դասերը դեռ չենք քաղել, և եթե հաջորդ ընտրություններում կրկին նույն իրավիճակը սեղծվի, իշխանությունը կգործի նույն կերպ: Պարզապես այսօր իշխանությունն ավելի լավ վիճակում է գտնվում` նպաստելով, որ այս տարիներին ՀԱԿ-ը մասնատվի:
«Հայաստանում չկա քաղաքական օրակարգ, կա միայն իշխանության գալու հարց: ՀԱԿ-ը, օրինակ, ասում է, որ եթե գա իշխանության, ամեն ինչ կգնա դեպի լավը, բայց ոչ ոքի չի բացատրել դրա տեսլականը»,- ասել է Արման Մելիքյանը` հավելելով, որ մեր երկրում ընտրությունների կեղծումը հանգեցրել է քաղքական ուժերի արժեզրկման:
