Աշխատավորների համերաշխության միջազգային օրն այս տարի Հայաստանում զուգորդվեց Մաքսային միությանն անդամագրվելու, ՌԴ նախագահին գովերգելու կոչերով: Հայաստանի կոմունիստական կուսակցությունը փողոց էր դուրս եկել «Կեցցե մաքսային միությունը», «Կեցցե Պուտինը», «Կեցցե հայ-ռուսական բարեկամությունը» կոչերով: Վերջին կանգառն էլ Հայաստանում Ռուսաստանի դեսպանատան մոտ էր, որտեղ երթի մասնակիցները նամակ հանձնեցին՝ խնդրելով, որ Հայաստանն անպայման անդամագրվի Մաքսային միությանը և որքան շուտ, այնքան լավ:
Մշակութաբան Վարդան Ջալոյանը «Առաջին լրատվական»-ի հետ զրույցում ասաց, որ դեռևս Խորհրդային Միության ժամանակ պետությունն ու կուսակցությունը մարդկանց գիտակցության մեջ մտցնում էին հակաարևմտյան ստերեոտիպեր, որ Արևմուտքը հանդիսանում է թշնամի՝ և՛ մշակութային, և՛ քաղաքական առումով. «Այդ ստերեոտիպերն այսօր էլ ազդում են մեր բնակչության վրա, և՛ եկեղեցին, և՛ իշխանությունները վարում են պրոռուսական քաղաքականություն: Նրանք ևս Արևմուտքի նկատմամբ որոշակի վախեր են սերմանում, և դա մարդկանց վրա շատ է ազդում»,- ասաց նա:
Ջալոյանը նշեց, որ Հայաստանի կոմունիստական կուսակցությունը սերտ կապերի մեջ է զյուգանովյան կուսակցության հետ, և հենց այդտեղից են այստեսակ լոզունգները. «Պետք է կանխել, բայց հնարավոր չէ, ինքներդ եք հասկանում, որ քարոզչության հիմնական միջոցը հեռուստացույցն է, իսկ այնտեղ ռուսական ալիքներն են»:
Մեր զրուցակցից հետաքրքրվեցինք նաև՝ արդյո՞ք սա գնալով ավելի շատ կազդի հասարակական տրամադրությունների վրա և պրոռուսական մտածելակերպն ավելի կխորանա՝ նաև հեշտացված կարգով ՌԴ անձնագիր ստանալու շնորհիվ. «Դրանք արտահայտում են հասարակության մի զգալի մասի տրամադրվածությունը, բայց միգրացիայի պատճառը ոչ թե հեշտ ՌԴ քաղաքացիություն ստանալն է, այլ պետության վարած քաղաքականությունը: Կրթական համակարգը երիտասարդների համար ապագա չի պահովում և այլն»:
Վարդան Ջալոյանն ընդգծեց, որ չնայած այն հանգամանքին, որ Մաքսային միությանն անդամագրումը զգալի գնաճ է բերելու Հայաստանին, մեր շահերին դեմ է, բայց դրան դեմ դուրս եկող ըստ էության չկա, ինչն էլ ցույց է տալիս այդ քարոզչության հաջողությունը: «Բայց ես չեմ կարծում, թե ՄՄ-ին ալտերնատիվ է առաջարկվում, մարդիկ ալտերնատիվը չգիտեն, չգիտեն ուրիշ ի՞նչ կարելի է անել, եթե ոչ գնալ ու Ռուսաստանում աշխատել»,- եզրափակեց նա:
Լուսանկարը` PAN Photo-ի
