Հելսինկյան ասոցիացիայի Վանաձորի գրասենյակի ղեկավար, իրավապաշտպան Արթուր Սաքունցը, անդրադառնալով Սերժ Սարգսյանի` իրավապահ մարմինների մասնակցությամբ հրավիրած խորհրդակցությանը, նկատեց` Սերժ Սարգսյանը նոր է զարթնել քնից:
Իրավապաշտպանի կարծիքով` նախագահի նման վարքագիծը ցույց է տալիս, որ նա իր պաշտոնավարման տարիների ընթացքում անտեղյակ է եղել իրավիճակից, ինչը բացառվում է:
«Սա մի վարքագիծ է` նախագահական ընտրություններից առաջ ինչ-որ դիրք բերելու համար: Բայց մեզ պետք են ոչ թե իմիտացիոն մոտեցումներ, ոչ թե իմիտացիոն նախագահի լիազորությունների իրականացում, այլ պետք է բովանդակային փոփոխություն: Ես, ցավոք սրտի, ոչ մի հիմք չեմ տեսնում, որ նա իրավիճակը փոխելու կամք է դրսևորել:
Մենք բազմաթիվ դեպքեր ենք ներկայացրել, հրապարակել: Դատական պրոցեսներ ենք նախաձեռնել: Դատախազության կողմից քրեական գործերի հսկողության հետ կապված` հարցեր ենք բարձրացրել, բայց մենք, ինչպես միշտ, տեսել ենք, որ դատախազաությունը անհաղորդ է մնում և պատշաճ հսկողություն չի իրականացնում, օրինակ` ոստիկանության աշխատակիցների կողմից քաղաքացիների նկատմամբ բռնությունների հիմքով քրեական գործեր հարուցելու, պատասխանատուներին բացահայտելու գործում:
Դատախազությունը ավելի շատ հակված է հանցագործներին կոծկելու, և հիմա մենք ումի՞ց պահանջենք:
Համակարգը ինքն իրենով ամբողջովին թաղված է կոռուպցիոն ճահճի մեջ և առանձին ելուստներ կտրելով` չի փոխվի: Սերժ Սարգսյանը միայն մի խնդիր ունի՝ ապահովելու դատական իշխանության անկախությունը: Եվ նույնիսկ ոչ թե ապահովելու, այլ ստեղծելու իրավական այնպիսի անվիճարկելի մեխանիզմներ, որով կապահովվի դատական իշխանության անկախությունը և ոչ թե կախվածությունը նախագահական նստավայրից:
Այդպիսով բոլոր հարցերը կլուծվեն` և՛ դատախազը պատասխան կտա, և՛ քաղաքացիները պատասխան կտան, և՛ ինքը պատասխան կտա, բայց ինքը պատրա՞ստ է իր գործառույթների համար պատասխանատվություն կրել դատական ատյանի առջև: Սա է հիմնական հարցը: Պատրա՞ստ է արդյոք ունենալ այնպիսի դատախազություն, որը քրեական գործ կհարուցի ամենաբարձր պաշտոնատար անձի նկատմամբ` հանցագործության կամ մարդու իրավունքների խախտման հիմքով:
Սփյուռքահայերը թալանվել են, սակայն քրեական գործեր չեն հարուցվում: Այդ գործերից մի մասի մեջ հիշատակվում է նաև իր եղբոր անունը: Ի՞նչ ցուցում է այս դեպքում դատախազությանը տվել Սերժ Սարգսյանը` քննե՞լ, թե՞ չքննել գործերը: Եթե կտա հրահանգ, և ես կտեսնեմ, որ քննություն է կատարվում, նոր ուրիշ կերպ կարտահայտվեմ: Ես կասեմ, որ այս մարդն իրապես կամք է ցուցաբերում, որ այն, ինչ խոսում է, նաև գործի է վերածում, իսկ դա առաջին հերթին պետք է վերաբերի իր շրջապատին»,- եզրափակեց Ա. Սաքունցը:
