Միջազգային հանրության ջանքերով հաջողվել է թուլացնել «Ալ-Քաիդա» ահաբեկչական խմբավորման «միջուկը», սակայն անցած տարի փոխվել են ահաբեկչական սպառնալիքի առանձնահատկությունները, լրջորեն ավելացել է ծայրահեղական նոր կազմակերպությունների թիվը: Այս մասին ասվում է ահաբեկչության դեմ պայքարի մասին ԱՄՆ Պետդեպի զեկույցում: Փաստաթուղթը ներառում է 2013-ի հունվարի 1-ից դեկտեմբերի 31-ն ընկած ժամանակահատվածը: Այս մասին հայտնում է ITAR-TASS-ը:
Զեկույցի հեղինակների ներկայացրած վիճակագրության համաձայն՝ ողջ աշխարհում ահաբեկչությունների թիվը 2012-ի համեմատ ավելացել է 43 տոկոսով: Անցած տարի իրականացվել է մոտ 9700 ահաբեկչություն (2012-ին՝ 6700), որոնք հանգեցրել են 17.8 հազար մարդու մահվան, 32.5 հազարը վիրավորվել են:
Նշվում է, որ «Ալ-Քաիդայի» թուլացումը հանգեցրել է նրան, որ խմբավորման հետ կապված կազմակերպությունները դարձել են ավելի անկախ՝ անձամբ ընտրելով իրենց թիրախները:
Ահաբեկչությունների զգալի մասն անցած տարի իրականացվել է միջկրոնական հակամարտությունների ֆոնին: Նման ահաբեկչություններ են իրականացվել հատկապես Սիրիայում, Լիբանանում և Պակիստանում:
