Ուկրաինայի նախկին վարչապետ Յուլյա Տիմոշենկոյին, ով հացադուլ էր հայտարարել խորհրդարանական ընտրություններում տեղ գտած խախտումների պատճառով, կարող են սկսել ստիպողաբար կերակրել: Intefax,-ի փոխանցմամբ` այս մասին հայտարարել է Պետական բանտային ծառայության ներկայացուցիչ Անդրեյ Լապինսկին:
Նրա խոսքերով` այդ մասին որոշումը պետք է կայացնեն բժիշկները` ելնելով դատապարտյալի առողջական վիճակից: Լապինսկին նաև հաղորդել է, որ ներկա պահին բանտի ղեկավարությունը փորձում է համոզել Տիմոշենկոյին դադարեցնել հացադուլը:
Հիշեցնենք, որ հացադուլ սկսելու մասին Տիմոշենկոն հայտարարել էր հոկտեմբերի 29-ին: Հայտարարության մեջ, որը կարդացել էր նրա փաստաբան Սերգեյ Վլասենկոն, նշվում էր, որ անցած խորհրդարանական ընտրություններն ամենաանարդարն էին անկախ Ուկրաինայի պատմության մեջ:
