Չունենալով մանևրելու մեծ դաշտ՝ Հայաստանը դարձել է պուտինիզմի փոքրիկ արբանյակը: «Առաջին լրատվական»-ի հետ բացառիկ հարցազրույցում այս մասին ասաց ՌԴ կառավարության նախկին անդամ, 1997-1998թթ. ՌԴ առաջին փոխվարչապետ, ներկայում ռուսաստանյան ընդդիմության առաջնորդ, ՌԴ նախագահ Վլադիմիր Պուտինի գլխավոր ընդդիմախոս Բորիս Նեմցովը:
Մասնավորապես՝ առաջին անգամ անդրադառնալով հայաստանյան իշխանությունների որոշմանը՝ ռուսական ինտեգրացիոն պրոյեկտներին միանալու մասին, Նեմցովն ընդունեց այն իրողությունը, որ Հայաստանը մանևրելու շատ փոքր դաշտ ունի, քանի որ հայաստանյան տնտեսությունը մեծապես կախված է Ռուսաստանից, Հայաստանն աշխարհագրորեն կտրված է այլ երկրների շուկաներից, ուստի մեծ հաշվով ընտրության դաշտը մեծ չէ:
Ըստ նրա՝ կարելի է միայն ցավակցել, որ կան նման իրողություններ:
«Ինձ համար շատ դժվար է խորհուրդներ տալ: Ամեն դեպքում ես կարծում եմ, որ ավտորիտարիզմի ուղին ոչ մի երկրի չի կարող հաջողություն բերել՝ առավել ևս, երբ ռուսական դիկտատուրան ամենագարշելին է, երբ մի թալանչի խումբը երկար պահպանում է իր իշխանությունը, և իշխանությունը չի փոխվում:
Հայտնի է՝ այնտեղ, որտեղ կա ժողովրդավարություն, կայանում է իշխանափոխություն. սա շատ կարևոր հանգամանք է երկրի զարգացման համար, իսկ Պուտինն ընտրել է երկրի ղեկավարման ամենագարշելի համակարգը, որն իրեն է հարմար, և որը պահպանում է իր իշխանությունն ու կապիտալը: Հայաստանն այս իմաստով պուտինիզմի փոքրիկ արբանյակն է, որը, ցավոք, մեծ ընտրության հնարավորություն չունի»,- ասաց նա:
«Առաջին լրատվական»-ը ռուս հայտնի գործչի հետ խոսեց Ուկրաինայում Ռուսաստանի վարած քաղաքականության, եվրասիական ինտեգրացիոն պրոյեկտների, հետխորհրդային տարածքում ընթացող զարգացումների, Հայաստանի արտաքին քաղաքական վեկտորի վերաբերյալ նրա պատկերացումների շուրջ:
Բորիս Նեմցովի հետ մեր ծավալուն հարցազրույցը` ավելի ուշ:
