Ամերիկացիների կեսից ավելիի (53 տոկոս) կարծիքով՝ եթե Պուտինը խեղդվեր, Օբաման կփրկեր նրան, բայց հակառակում վստահ չեն, թե՝ Պուտինը կփրկեր Օբամային, և պատրաստ են իրենք փրկել թե մեկին, թե մյուսին: Այս մասին են վկայում Huffington Post-ի և YouGov ընկերության անցկացրած հարցման արդյունքները:
Ավելի վաղ «ուղիղ կապի» ժամանակ Պուտինին հարցրել են՝ ԱՄՆ նախագահ Բարաք Օբաման իրեն կփրկե՞ր, եթե ինքը խեղդվելիս լիներ: Պուտինն ասել է, որ Օբաման «պարկեշտ մարդ է, բավական քաջ և, իհարկե, կաներ դա»: Օբաման Հարավային Կորեայում մամլո ասուլիսի ժամանակ պատասխանելով նույն հարցին՝ վստահեցրել էր, որ դա իսկապես այդպես է:
Հարցված ամերիկացիների կեսից ավելին (53%) կարծում է, որ Օբաման կփրկեր Պուտինին՝ չնայած 29%-ը կասկածում է այդ հարցում: Սոցիոլոգները նաև հակառակ սցենարի մասին են հարցրել, որը երկու նախագահներից ոչ մեկը չի քննարկել: Հարցված ամերիկացիների 25%-ը կարծում է, որ Պուտինը կփրկեր խեղդվող Օբամային, իսկ 51%-ը կասկածում է դրանում: Սոցիոլոգների հարցին՝ եթե հարցվածները խեղդվեին, և ափին միաժամանակ լինեին և Պուտինը, և Օբաման, ո՞ւմ կնախընտրեին, որ փրկեր իրենց, ի պատասխան՝ 48%-ն ասել է, որ ավելի լավ է՝ իրենց ԱՄՆ նախագահը փրկի, 20%-ը փրկչի դերում նախընտրել է Պուտինին, իսկ մնացածն ասել է, որ այդ դերի համար երկուսն էլ հարմար են:
Մասնակիցներին հարցրել են նաև՝ իրենք կփրկեի՞ն խեղդվող Օբամային և Պուտինին: Պարզվել է, որ հարցվածների 71%-ը պատրաստ է փրկել ԱՄՆ նախագահին, 57%-ը՝ ՌԴ նախագահին: Օբամային փրկելու պատրաստակամություն է հայտնել Դեմոկրատական կուսակցության հետևորդների 79%-ը, հանրապետականների՝ 52%-ը:
Հարցումն անցկացվել է հեռախոսով, ապրիլի 18-21-ը՝ ԱՄՆ հասուն տարիքի հազար քաղաքացիների շրջանում: Հարցվածների ընտրության ժամանակ օգտագործվել են այնպիսի գործոններ, ինչպիսիք են՝ տարիքը, ռասայական պատկանելությունը, սեռը, կրթությունը, զբաղվածությունը, եկամուտները, ամուսնական կարգավիճակը, երեխաների թիվը, քաղաքական հայացքները, համացանցին հասանելիությունը, հետաքրքրությունը քաղաքականության նկատմամբ, կրոնական պատկանելությունը և եկեղեցի գնալու հաճախականությունը:
